Վրաստանի ազգային վիճակագրական ծառայության հրապարակած տվյալների համաձայն՝ ըստ զբաղեցրած պաշտոնի՝ երկրում ամենաբարձր միջին աշխատավարձը ստանում են ղեկավարները։ Մասնավորապես, Geostat-ի տվյալներով՝ 2025 թվականին, ըստ մասնագիտությունների և պաշտոնների, վարձու աշխատողների ամենաբարձր միջին ամսական անվանական աշխատավարձը գրանցվել է ղեկավարների շրջանում և կազմել 3609 լարի, իսկ ամենացածրը՝ ոչ որակավորում ունեցող աշխատողների շրջանում՝ 1132 լարի։ 2025 թվականի տվյալների համաձայն՝ ըստ զբաղեցրած պաշտոնի, երկրում միջին ամսական աշխատավարձերը բաշխվել են հետևյալ կերպ. Ղեկավարներ՝ 3609 լարի, Մասնագետներ՝ 2301 լարի, Տեխնիկական և տեխնիկական աջակցության մասնագետներ՝ 2188 լարի, Վրաստանում միջին աշխատավարձը՝ 2165 լարի, Արհեստավորներ և հարակից մասնագիտությունների աշխատողներ՝ 2066 լարի, Մեքենաների և սարքավորումների օպերատորներ ու հավաքողներ՝ 1944 լարի, Գրասենյակային օժանդակ անձնակազմ՝ 1897 լարի, Ծառայությունների և վաճառքի ոլորտում զբաղված անձինք՝ 1534 լարի, Գյուղատնտեսության, անտառային տնտեսության և ձկնորսության որակավորված աշխատողներ՝ 1261 լարի, Ոչ որակավորում ունեցող աշխատողներ՝ 1132 լարի։ Հատկանշական է նաև, որ Ազգային վիճակագրական ծառայության տվյալներով՝ բոլոր պաշտոններում տղամարդկանց աշխատավարձերը գերազանցում են կանանց աշխատավարձերը (հիմնականում՝ խմբի ներսում)։ Օրինակ՝ ղեկավարների պաշտոններում կանանց աշխատավարձը կազմել է 2713 լարի, իսկ տղամարդկանցը՝ 4312 լարի։ «2025 թվականին մեկ վարձու աշխատողի հաշվով գործատուների միջին տարեկան ծախսերը կազմել են 26 671 լարի, որից 97,4%-ը բաժին է ընկել աշխատավարձին, իսկ 2,6%-ը՝ այլ ծախսերին (սոցիալական ապահովություն, անձնակազմի ուսուցում և վերապատրաստում, մշակութային-լուսավորչական աշխատանք, առողջապահություն և այլ միջոցառումներ)»։ «Ըստ տնտեսական գործունեության տեսակների՝ մեկ աշխատողի հաշվով միջին տարեկան ծախսերն ամենաբարձրն են եղել ֆինանսական և ապահովագրական ոլորտում՝ կազմելով 51 494 լարի, իսկ ամենացածրը՝ այլ ծառայությունների ոլորտում՝ 14 537 լարի», — նշված է Geostat-ի տեղեկատվության մեջ։ Նյութը՝ BPN.ge-ի