Հայաստանի Հանրապետութեան Ազգային ժողովը երէկ՝ Հինգշաբթի, 29 Հոկտեմբերին, 63 «կողմ» եւ 32 «դէմ» ձայներու յարաբերակցութեամբ վաւերացուց ԹՐԻՓՓ-ին առնչուող հայ-ամերիկեան ռազմավարական համաձայնագիրը: Արտաքին գործոց նախարար Արարատ Միրզոյեանի ներկայացուցած սոյն փաստաթուղթը քննարկման դրուած էր նախանցեալ օր: «Ուժեղ Հայաստան» եւ «Հայաստան» ընդդիմադիր խմբակցութիւնները, խիստ քննադատութեան ենթարկելէ քանի մը օր ետք, երէկ դէմ քուէարկեցին համաձայնագրին: Յիշեալ միջպետական համաձայնագրով կ՚ամրապնդուի Սիւնիքի տարածքով Ատրպէյճանին դէպի Նախիջեւան անխոչընդոտ կապ ապահովելու դրոյթը՝ Հայաստանի համար նախատեսուած փոխադարձ առաւելութիւններով: Ընդդիմադիր գործիչներու մտահոգութեան հիմնական պատճառը Հայաստանի քաղաքացիներու՝ Ատրպէյճանի տարածքով անցման պայմաններու անորոշութիւնն է: Պաքուն մինչեւ օրս որեւէ պարտաւորութիւն չէ ստանձնած անխոչընդոտ տեղաշարժ ապահովելու ուղղութեամբ, եւ փաստաթուղթ մը չէ ստորագրուած այս մասին: Նոյնիսկ բանաւոր հաստատումներ չկան, թէ սահմանային ի՛նչ մեքանիզմներով ՀՀ քաղաքացիները Նախիջեւանով պիտի կարենան երթեւեկել Հայաստանի հիւսիսային եւ հարաւային շրջաններու միջեւ: Հայաստանի իշխանութիւնները դեռ որոշակի պատասխան չեն տար այս հարցին. արտաքին գործոց նախարարը վերջերս միայն նշած էր, որ հարցը «դեռ ճշգրտումի կարիք ունի»: The post ԱԶԳԱՅԻՆ ԺՈՂՈՎԸ ՀԱՍՏԱՏԵՑ ԹՐԻՓՓ-Ի ՀԱՄԱՁԱՅՆԱԳԻՐԸ. ԸՆԴԴԻՄՈՒԹԻՒՆԸ ԴԷՄ ՔՈՒԷԱՐԿԵՑ appeared first on Գանձասար .