Լեհաստանի Կրակով քաղաքի կենտրոնում կրակոցներ արձակած տղամարդը Լեհաստանի քաղաքացի է և առայժմ հայտնի միակ կասկածյալը։ Այս մասին հայտնել է Փոքր Լեհաստանի վոյեվոդության ոստիկանությունը։ «Կրակովի գլխավոր շուկայի հրապարակում տեղի ունեցած միջադեպի հեղինակը Լեհաստանի քաղաքացի է։ Մենք հերքում ենք ոստիկանի մահվան և մեկ այլ կասկածյալի որոնման մասին տեղեկությունները։ Միակ հայտնի հանցագործը կալանավորված է», – ասվում է գերատեսչության հայտարարության մեջ։ RMF24-ի տվյալներով՝ հարձակվողը 25 տարեկան է։ Ավելի վաղ հայտնել էինք , որ Լեհաստանի քաղաքներից մեկում՝ Կրակովի կենտրոնում, կրակոցներ են տեղի ունեցել, որի հետևանքով հինգ մարդ է զոհվել, կան նաև տուժածներ։ Լեհական ռադիոյի հաղորդմամբ՝ Կրակովում կրակոցներ արձակողը զինվորական համազգեստ է կրել և կրակել է երկարափող ռազմական ոճի զենքից։ Տղամարդը կրակ է բացել անցնող մեքենայից՝ թիրախավորելով պատահական մարդկանց: Հինգ մարդ զոհվել է, կան նաև վիրավորներ, այդ թվում՝ ոստիկաններ: Կրակողը ձերբակալվել է. նա վիրավորվել է ձերբակալության ժամանակ և տեղափոխվել հիվանդանոց: Լեհաստանի վարչապետ Դոնալդ Տուսկը տեղի ունեցած հրաձգությունը ահաբեկչություն է անվանել ։