Նիդերլանդների ոստիկանությունը Ամստերդամում ձերբակալել է Microsoft-ի տվյալների մշակման կենտրոնի կառուցման դեմ բողոքի ակցիայի 150-200 մասնակցի, հայտնել է dpa-ն։ Հարյուրավոր ցուցարարներ ներխուժել են շինհրապարակ, ինչից հետո իրավապահները սկսել են ձերբակալությունները։ Ոստիկանության տվյալներով՝ ձերբակալվածներից ոմանք կասկածվում են շինհրապարակից նյութեր գողանալու, մյուսները՝ գույքը վնասելու մեջ։ Բոլոր ձերբակալվածները պետք է հարցաքննվեն։ Ինչպես հայտնել է նիդերլանդական NOS հեռուստառադիոընկերությունը, շինհրապարակում հավաքվել էին երկու խմբերի ակտիվիստներ։ Fossielvrij NL բնապահպանական և հասարակական շարժումը նախատեսում էր ակցիա անցկացնել շինհրապարակի մոտ՝ բողոքելով տվյալների մշակման կենտրոնների կողմից էներգիայի մեծ սպառման դեմ։ Geef Tegengas շարժման մասնակիցները փորձել են գործիքների օգնությամբ քանդել ցանկապատը և ներխուժել օբյեկտի տարածք։ Այս խումբը հանածո վառելիքի, կապիտալիզմի, ռազմական ոլորտի ընդլայնման և խոշոր տեխնոլոգիական նախագծերի դեմ իր արշավների շրջանակում արգելափակում է ենթակառուցվածքը, նավահանգիստները և շինհրապարակները։ Ոստիկանությունը սկզբում ցուցարարներից պահանջել է հանձնել գործիքները և նրանց ուղղորդել ցույցի համար հատուկ հատկացված տարածք։ Սակայն հետագայում ակտիվիստները ճեղքել են պատնեշն ու ներխուժել շինհրապարակ։ NOS-ի կադրերում երևում է, թե ինչպես են պաշտպանիչ հանդերձանքով ոստիկանները մահակներ կիրառում ցուցարարների նկատմամբ։ Geef Tegengas-ում ակցիան անվանել են Եվրոպայում տվյալների մշակման խոշոր կենտրոնների դեմ առաջին զանգվածային բողոքի ակցիան։