«ԱԼԻՔ», Կ. Դ. – Հ. Մ. Մ. «Նայիրի» մ.-ի Արւեստից բաժանմունքի նախաձեռնութեամբ՝ չորեքշաբթի, նոյեմբերի 4-ին Հայ մշակոյթի տօնին նւիրւած բանախօսական-գեղարւեստական յայտագրով յագեցած միջոցառում էր կազմակերպւել միութեան կենտրոնատեղի «Սուքերեան» սրահում: «Հայոց գրի պատմութիւնն ու գեղագրութեան արւեստը» խորագրով բանախօսական երեկոյի բանախօս էր հրաւիրւել Ջուլիետա Հայրապետեանը։ Մշակոյթի տօնին նւիրւած միջոցառումը մեկնարկեց ասմունքային կատարումով, որը ներկայացրեց Հ.Բ.Ը.Մ.-ի «Մարի Մանուկեան» դպրոցից Անի Ազիզեանը։ Բացման խօսքով հանդէս եկաւ Ադրինէ Դաւթեանը, ընդգծելով. «Հայ մշակոյթը մեր ինքնութեան անբաժանելի մասն է, մեր անցեալի յիշողութեան ու ապագայի ուղենիշը» եւ ապա բեմ հրաւիրեց օրւայ բանախօսին: Իր ելոյթի ընթացքում բանախօսը անդրադարձաւ տարբեր լեզուներում գեղագրութեանը, հայոց գրերի գիւտին, հայկական տառերի զարդանախշերին, տպագրութեան եւ ի մասնաւորի հայկական տպագրութեան սկզբնաւորմանը եւ տպագրի գրութիւններում օգտագործւող հայերէն տառատեսակների զարդանախշերին, երկաթագրերին, հայկական տառերի տարբեր ձեւաւորումներին, որոնք նկատելի են քարտաշ վարպետների միջոցով դաջւած տապանաքարերի վրայ եւ կարեւորեց նոր սերնդի մօտ հայկական գիր ու գրականութեան եւ գեղեցիկ գրելու ուսուցման անհրաժետութիւնը: Ներկայ էին՝ Թ. Հ. Թ. Պատգամաւորական ժողովի ներկայացուցիչներ, Թեմական խորհրդրի ներկայացուցիչ Ժորժ Հայրապետեանը, «ԱԼԻՔ» օրաթերթի գլխաւոր խմբագիր Արտոյտ Զոհրաբեանը, Տ. Գրիգորիս քհնյ. Ներսիսեանը, միութիւնների, դպրոցների, Եկեղեցական խորհուրդների ներկայացուցիչներ եւ ներկաներ: Միջոցառումը աւարտւեց մեներգով, որը ներկայացրեց միութեան երգչախմբի խմբավար Ժիլբերտ Կարապետեանը: