Երէկ ՀՅԴ Հայաստանի Գերագոյն մարմինի ներկայացուցիչ, Ազգային ժողովի «Հայաստան» խմբակցութեան պատգամաւոր Իշխան Սաղաթէլեան կատարեց հետեւեալ յայտարարութիւնը. «Սահմանադրութեան մասին. Նախ պէտք է փաստել, որ Փաշինեանը տապալել է Սահմանադրութեան փոփոխութիւնը որպէս Հայաստանի Հանրապետութեան ներքին օրակարգ ներկայացնելու գործը. ընդդիմութեանը յաջողուել է հանրութեանը ցոյց տալ իրականութիւնը, եւ այսօր Հայաստանում իւրաքանչիւրը գիտի` Սահմանադրութեան փոփոխութիւնը Ալիեւի պահանջն է, այդ իսկ պատճառով էլ այդ փաթեթը ստացել է իր արժանի անուանումը` «ալիեւեան սահմանադրութիւն»: Ընդդիմութեանը յաջողուել է փաստի առաջ կանգնեցնել ե՛ւ Փաշինեանին, ե՛ւ Ալիեւին, որոնք այսօր Հայաստանի խորհրդարանում չունեն սահմանադրական մեծամասնութիւն, հետեւապէս` ալիեւեան հերթական պահանջը կատարելու լիազօրութիւն: Ընդդիմութեան հասցէին հնչող սպառնալիքների մասին. Սա իսկապէս պատմական պահ է, եւ շանթաժի, պատանդառութեան ոեւէ գործիքակազմ չի կարող ազդել ընդդիմադիր որեւէ անձի որոշման վրայ եւ ստիպել նրան կողմ արտայայտուել այն գործընթացին, որը յանգեցնելու է Հայաստանում «ալիեւեան սահմանադրութեան» ընդունմանը: Պատանդառութիւնները, ձերբակալութիւնները, ընդդիմադիր առաջնորդների կալանաւորումները, այդ թւում նաեւ կալանաւորումների կանխատեսելի նոր ալիքը, միայն կարող են ամրապնդել ընդդիմադիրների վճռականութիւնը` «ո՛չ» ասելու Փաշինեանի եւ Ալիեւի սահմանադրութեանը: Ինչ վերաբերում է Ալիեւի եւ Փաշինեանի ցանկացած երաշխիքի` դրանք ունեն զերօ նշանակութիւն: Յիշեցնենք` 2022 թուականի մարտին Փաշինեանը յայտարարում էր` եթէ Արցախի բանակցութիւններում իջեցնենք նշաձողը, կ՛երաշխաւորենք Արցախի ժողովրդի անվտանգութիւնը եւ այդ հարցի շուրջ կ՛ապահովենք միջազգային համերաշխութիւն: Դրանից 6 ամիս յետոյ վերջինս Իլհամ Ալիեւի հետ ապահովեց Արցախի հայաթափումն ու ցեղային զտումը: Ուստի ստեղծուած իրավիճակում ընդդիմութեան պատմական դերակատարութիւնը շարունակում է մնալ հետեւեալը` ամուր կանգնել միակ ճշմարիտ դիրքում, «ո՛չ» ասել Նիկոլ Փաշինեանի եւ Իլհամ Ալիեւի համատեղ փաթեթին` Հայաստանում «ալիեւեան սահմանադրութեան» ընդունմանը, անքլաւների անուան տակ տարածքային նոր զիջումներին»: