Հոկտեմբերի 30-ին Եգիպտոսում ուղևորատար ավտոբուսը բախվել է ավազով բեռնված բեռնատարին։ Պատահարը տեղի է ունեցել առավոտյան՝ Ռաս Ղարեբ–Հուրգադա ավտոճանապարհի 95-րդ կիլոմետրին։ Վթարի հետևանքով զոհվել է 3 մարդ (այդ թվում՝ ավտոբուսի վարորդը)։ Տարբեր աստիճանի վնասվածքներ է ստացել 25 ուղևոր։ Ուղևորների թվում եղել են օտարերկրյա զբոսաշրջիկներ: Տեղի պատասխանատու մարմինների փոխանցմամբ՝ վիրավորների թվում կան Ռուսաստանի, Իտալիայի և Ֆրանսիայի քաղաքացիներ։ Եգիպտոսի դատախազությունն արդեն հետաքննություն է սկսել՝ պարզելու բախման հստակ պատճառները և ճանապարհային երթևեկության կանոնների հնարավոր խախտումները։