Ազգային ժողովի նիստում «Քաղաքացիական պայմանագիր» խմբակցության պատգամավոր Նազելի Բաղդասարյանն անդրադարձավ խորհրդարանում տեղի ունեցած միջադեպերին, դահլիճում հնչած հայհոյանքներին և կոչ արեց տղամարդ պատգամավորներին ներողություն խնդրել կին գործընկերներից։ Բաղդասարյանն ասաց, որ թեև միջադեպերից հետո որոշ պատգամավորներ Ազգային ժողովի ամբիոնից ներողություն էին խնդրել հանրությունից և ընտրողներից, որևէ մեկը չէր անդրադարձել այն հանգամանքին, որ դահլիճում ներկա են եղել նաև կանայք, որոնց ներկայությամբ հնչել են հայհոյանքներ։ Նա դիմեց տղամարդ պատգամավորներին՝ կոչ անելով քաղաքական կամք դրսևորել և Ազգային ժողովի ամբիոնից ներողություն խնդրել կին գործընկերներից։ Խոսելով ընդդիմադիրների վարքագծի մասին՝ Բաղդասարյանը նաև ենթադրություն հայտնեց, որ նրանց կոշտ դիրքորոշման վրա կարող էին ազդեցություն ունենալ արտաքին՝ իր ձևակերպմամբ «հյուսիսից» հնչած դժգոհությունները։ Նա դա կապեց Խաղաղության խորհրդին կողմ քվեարկելու և TRIPP-ի վավերացումը չտապալելու հետ։ Միաժամանակ Բաղդասարյանն ասաց, որ խորհրդարանում տեղի ունեցած բախումներում հաղթողներ չեն եղել։ Նրա գնահատմամբ՝ չի հաղթել ոչ իշխանությունը, ոչ ընդդիմությունը, իսկ տեղի ունեցածից տուժել է հասարակությունը։ Բաղդասարյանի ելույթից հետո ԱԺ փոխնախագահ Վահագն Ալեքսանյանը հակադարձեց՝ բոլոր տղամարդ պատգամավորներին նույն հարթության վրա դնելու վերաբերյալ։ Նա ասաց, որ չի ընդունում համահավասարեցնող ձևակերպումները և ընդգծեց, որ յուրաքանչյուր միջադեպի դեպքում կարևոր է պարզել՝ կողմերից որն է այն սկսել։ Մանրամասները՝ տեսանյութում։ Եվգենյա Համբարձումյան