Թուրքիայի նախագահ Ռեջեփ Թայիփ Էրդողանը վերահաստատել է Անկարայի հանձնառությունը՝ առավելագույնս նպաստելու Հայաստանի և Ադրբեջանի միջև հարատև խաղաղության հաստատմանը: Այս մասին նա հայտարարել է Անկարայում Թյուրքական պետությունների կազմակերպության գագաթնաժողովի բացման ժամանակ: Թուրքիայի առաջնորդը նշել է, որ Անկարան ողջունում և աջակցում է այն շփումներն ու բանակցությունները, որոնք Ադրբեջանն իրականացնում է Հայաստանի հետ: Նա ընդգծել է, որ տարածաշրջանային հակամարտությունները ձեռնտու չեն կողմերից ոչ մեկին և բացասաբար են անդրադառնում համաշխարհային տնտեսության, առևտրի ու էներգետիկ շուկաների վրա: Թուրքիան պատրաստակամություն է հայտնել ներդնել իր բոլոր ջանքերը՝ Հարավային Կովկասում վերջնական խաղաղության հասնելու համար: