Ուկրաինան հայտնել է, որ Ռուսաստանը ռեակտիվ շարժիչով ԱԹՍ-ով հարվածել է Դնեպրի երկաթուղային կայարանին։ Թիրախում է հայտնվել Զապորոժիե ուղևորվող քաղաքացիական գնացքներից մեկը: Հարվածի հետևանքով զոհվել է առնվազն 13 մարդ, կան վիրավորներ: Կրեմենչուգում էլ բազմահարկ շենքին հասցված հարվածի հետևանքով երկու մարդ է զոհվել, հաղորդվում է տուժածների մասին։ Վոլոդիմիր Զելենսկին կոչ է արել ավելի խիստ պատժամիջոցներ կիրառել Ռուսաստանի դեմ: Ուկրաինայի նախագահը սարսափելի է որակել Դնեպրում տեղի ունեցածը: Նրա խոսքով՝ Միացյալ Նահանգները և Եվրոպան պետք է ավելի վճռական գործողություններ ձեռնարկեն: Ռուսաստանի ՊՆ-ն էլ հայտնել է գիշերը ուկրաինական 1214 անօդաչու թռչող սարք խոցելու մասին: Թիրախում են եղել Սմոլենսկի, Վորոնեժի, Ռյազանի, Ռոստովի, Մոսկվայի և այլ մարզեր, ինչպես նաև Բաշկորտոստանը։ Նշվում է, որ սա պատերազմի մեկնարկից ի վեր ամենազանգվածային հարվածներից մեկն է: