1999 թվականի հոկտեմբերի 27-ի ահաբեկչության գործով վերաբացված քրեական վարույթի շրջանակում վերջին մեկ տարում կատարվել են շուրջ 10 հարցաքննություններ և լրացուցիչ հարցաքննություններ, առգրավվել ու ուսումնասիրվել են գաղտնի փաստաթղթեր։ Գլխավոր դատախազության հաղորդմամբ՝ իրականացվել են նաև փաստաթղթերի զննումներ, տրվել են օպերատիվ-հետախուզական միջոցառումներ իրականացնելու երեք հանձնարարություններ, ինչպես նաև իրականացվում են գաղտնի քննչական գործողություններ։ Գլխավոր դատախազության հաղորդագրությունը՝ ստորև․ «2019 թվականի դեկտեմբերի 27-ին վերսկսված՝ 1999 թվականի հոկտեմբերի 27-ին Նաիրի Հունանյանի և մյուսների կողմից տեռորիստական ակտ կատարելու վերաբերյալ քրեական վարույթի շրջանակում 2025 թվականի հոկտեմբերի 27-ից առ այսօր կատարվել են ապացուցողական և վարութային մի շարք գործողություններ։ Մասնավորապես՝ – Կատարվել են շուրջ 1 տասնյակ հարցաքննություններ և լրացուցիչ հարցաքննություններ։ – Ուղարկվել են տեղեկատվության պահանջի մասին դիմումներ։ – Քրեական վարույթով էական նշանակություն ունեցող մի շարք հանգամանքներ պարզելու համար օպերատիվ-հետախուզական միջոցառումներ իրականացնելու վերաբերյալ 3 հանձնարարություններ են տրվել օպերատիվ մարմնին։ – Կատարվել են փաստաթղթերի զննումներ։ – Քրեական վարույթով էական նշանակություն ունեցող հանգամանքներ պարզելու նպատակով հսկող դատախազի թույլտվությամբ առգրավվել և ուսումնասիրվել են մի շարք գաղտնի փաստաթղթեր։ – Իրականացվում են գաղտնի քննչական գործողություններ։ – Հսկող դատախազը նախորդած ժամանակահատվածում իրականացրել է դեպքի մասին որոշակի տեղեկություններ ունեցող քաղաքացիների ընդունելություններ: Ընդունելությունների արդյունքներն ուղարկվել են քննիչին՝ համապատասխան ապացուցողական գործողություններ կատարելու նպատակով: Հիշեցնենք, որ Գլխավոր դատախազի՝ 2024 թվականի փետրվարի 14-ի որոշմամբ, քրեական վարույթով նախաքննությունը շարունակելը հանձնարարվել է Քննչական կոմիտեին։ Նախաքննությունն ընթացքի մեջ է»։