ԵՐԵՎԱՆ, 10 նոյեմբերի – Sputnik. ՀՀ ԱԺ «Հայաստան» խմբակցությունը քրեակատարողական հիմնարկում 46-ամյա Արսեն Գևորգյանի մահվան համար պատասխանատու է համարում գործող իշխանություններին և վարչապետ Նիկոլ Փաշինյանին։ Այս մասին ասվում է խմբակցության տարածած հայտարարությունում։Ինչպես հայտնի է, որ այսօր կալանավայրում ինֆարկտից մահացել է «Ուժեղ Հայաստանից» Ստեփանավան համայնքի ղեկավարի թեկնածու առաջադրված 46–ամյա Արսեն Գևորգյանը:Ընդդիմադիր խմբակցության գնահատմամբ՝ Հայաստանում կալանքը վերածվել է քաղաքական հակառակորդներին լռեցնելու, մեկուսացնելու և պատժելու գործիքի։«Արսեն Գևորգյանի մահը ևս մեկ անգամ ի ցույց է դնում քաղաքական հետապնդումների մարդկային ծանր հետևանքները և դրանց համար պատասխանատվության անհրաժեշտությունը»,– ընդգծել են խմբակցությունում։Հայտարարության հեղինակները նաև հիշեցրել են, որ անազատության մեջ շարունակում են մնալ ընդդիմադիր քաղաքական ուժերի առաջնորդներ և այլախոհներ։«Հայաստան» խմբակցությունը ցավակցություն է հայտնել Արսեն Գևորգյանի ընտանիքին, հարազատներին և «Ուժեղ Հայաստան» կուսակցության ներկայացուցիչներին։Հիշեցնենք, որ Ստեփանավանի համայնքապետի թեկնածու Արսեն Գևորգյանի մահվան դեպքով նախաձեռնվել է քրեական վարույթ։