ԵՐԵՎԱՆ, 6 նոյեմբերի – Sputnik. Հայաստանում 12 պատմամշակութային օբյեկտ ստացել է պատմության և մշակույթի անշարժ հուշարձանի կարգավիճակ։ Այս մասին հայտնում է ՀՀ ԿԳՄՍ նախարարությունը` հավելելով, որ որոշումն ընդունվել է նախարարության փորձագիտական հանձնաժողովի՝ այս տարվա երկրորդ նիստում տրված դրական եզրակացությունների հիման վրա։Տեղական նշանակության հուշարձանի կարգավիճակ են ստացել Արարատի մարզի Արտաշատ քաղաքի՝ 1983 թվականին ստեղծված հարթաքանդակների խումբը, Սյունիքի մարզի Տաթևի XVII–XIX դարերի գյուղատեղին, Բռնակոթում գտնվող պատմական կառույցներն ու տապանաքարերը, այդ թվում՝ հայագետ Նիկողայոս Ադոնցի հայրական տունը (1861 թ.), ինչպես նաև Վայոց Ձորի մարզի Արտաբույնքի ուշ միջնադարյան գյուղատեղին, գերեզմանոցն ու մատուռը։Հանրապետական նշանակության հուշարձանի կարգավիճակ են ստացել Վայոց Ձորի մարզի Արատեսի XIII դարի ժայռախաչերը և Սյունիքի մարզի Անգեղակոթի X–XI դարերի երեք խաչքարերը։Հանձնաժողովը քննարկել է «Վահագն վիշապաքաղ» քանդակի, Արագածոտնի մարզի «Հին Կարբի» գյուղատեղիի, Սյունիքի, Վայոց Ձորի և Տավուշի մի շարք հուշարձանների պահպանական գոտիների նախագծերը։Ընդունելի համարված նախագծերը կուղարկվեն համայնքների ղեկավարների և տարածքային կառավարման պետական մարմինների համաձայնեցմանը, որից հետո կհաստատվեն ԿԳՄՍ նախարարության կողմից։