Հինգշաբթի օրը եվրոպական ավիաընկերությունների ավելի քան տասը չվերթի անվտանգությանը սպառնացող ահազանգեր են ստացվել, ինչի հետևանքով օդանավերի մեծ մասը ստիպված է եղել արտակարգ կամ չնախատեսված վայրէջք կատարել։ Զանգվածային խափանումների պատճառը ռումբի տեղադրման մասին անանուն հաղորդագրություններն են եղել, որոնք ստացվել են, այդ թվում՝ էլեկտրոնային փոստով։ Մասնավորապես, Aer Lingus ավիաընկերության Դուբլին-Հռոմ չվերթը վերահղվել է դեպի Ֆրանսիայի Նորմանդիա շրջանում գտնվող Էվրե ռազմական ավիաբազա, իսկ Միլանից Վարշավա ուղևորվող Wizz Air-ի օդանավը հարկադրված վայրէջք է կատարել Վիեննայում։ Սոֆիա մեկնող միանգամից երեք օդանավ ստիպված է եղել վայրէջք կատարել Բուլղարիայում։ Միևնույն ժամանակ, Բրյուսելում վայրէջք է կատարել LOT լեհական ավիաընկերության՝ Վարշավայից մեկնած չվերթը։ Ստուգումներից հետո իրավապահ մարմինները որոշել են լրացուցիչ անվտանգության միջոցառումներ չձեռնարկել։ Ֆիննական Finnair ավիաընկերությունը Հռոմ և Վիեննա մեկնող իր չվերթների վերաբերյալ երկու կեղծ ահազանգ է ստացել։ Իսկ Չեխիայի իշխանությունները անվտանգության արձանագրություններ են գործարկել դեպի Պրահա ուղևորվող չորս օդանավերի առնչությամբ՝ չնայած սպառնալիքի մակարդակը ցածր են գնահատել։ Իրավապահ մարմինների և ավիափոխադրողների տվյալներով՝ բոլոր օդանավերն անվտանգ վայրէջք են կատարել։ The post Ականապատման սպառնալիքների ալիք․ եվրոպական ավելի քան 10 չվերթ հարկադիր վայրէջք է կատարել appeared first on Alphanews .