ՀՀ կառավարության նոյեմբերի 5-ի նիստի օրակարգում ընդգրկված է Հայաստանի Հանրապետության և Վերակառուցման և զարգացման եվրոպական բանկի միջև «Հայաստան՝ Երևանի և Սյունիքի մաքսային և լոգիստիկ կենտրոններ. Կանաչ հավաստագրման խորհրդատվական աջակցություն» դրամաշնորհային համաձայնագրի հաստատման հարցը։ Ինչպես տեղեկանում է ArmLur.am-ը, համաձայնագիրը ստորագրվել է 2026 թվականի օգոստոսի 12-ին՝ ՀՀ պետական եկամուտների կոմիտեի և Վերակառուցման և զարգացման եվրոպական բանկի միջև։ Դրամաշնորհի նպատակն է աջակցել Երևանում և Սյունիքում կառուցվող մաքսային և լոգիստիկ կենտրոնների ծրագրերի իրականացմանը՝ ապահովելով դրանց համապատասխանությունը միջազգային բնապահպանական չափանիշներին։ Նախատեսվում է, որ Սյունիքի մաքսային և լոգիստիկ կենտրոնը կկառուցվի Սիսիանից 7 կմ հեռավորության վրա՝ Շաքի գյուղի մոտակայքում գտնվող 7.7 հա հողատարածքում։ Ծրագրի շրջանակում նախատեսվում է կառուցել վարչական շենք՝ տանիքում արևային էներգակայանով։ Երևանի մաքսային և լոգիստիկ կենտրոնը նախատեսվում է կառուցել Կոտայքի մարզի Նաիրի համայնքի Պռոշյան գյուղում՝ Գևորգ Չաուշի խճուղի թիվ 5 հասցեում։ Այստեղ նախատեսվում է ստեղծել արտաքին տնտեսական գործունեության կենտրոն և ՊԵԿ վարչական շենք։ Նշենք, որ Սյունիքի կենտրոնի կառուցման համար Հայաստանի Հանրապետությանը նախատեսվում է հատկացնել շուրջ 12 մլն եվրո, որից 10 մլն եվրոն վարկային միջոցներ են, իսկ 2 մլն եվրոն՝ դրամաշնորհ։ Երևանի կենտրոնի համար նախատեսված է շուրջ 45 մլն եվրո, որից 39 մլն եվրոն վարկ է՝ երկու տրանշով, իսկ 6 մլն եվրոն՝ դրամաշնորհ։ Իսկ դրամաշնորհային համաձայնագրով նախատեսված կանաչ հավաստագրման խորհրդատվական աջակցությունը ներառում է բնապահպանական չափանիշներին համապատասխանության ապահովում, էներգաարդյունավետության բարձրացման, ռեսուրսների խնայողաբար օգտագործման և էկոլոգիապես մաքուր նյութերի ու տեխնոլոգիաների կիրառման վերաբերյալ մասնագիտական խորհրդատվություն։ Կառավարությանն առաջարկվում է հաստատել օգոստոսի 12-ին ստորագրված դրամաշնորհային համաձայնագիրը։ Սոնա Գրիգորյան