ԵՐԵՎԱՆ, 31 հոկտեմբերի – Sputnik. ՀՀ արտաքին գործերի և միջազգային առևտրի նախարար Արարատ Միրզոյանը Բահրեյնում անցկացվող «Մանամայի երկխոսության» շրջանակում հանդիպել է Լիբանանի և Բահրեյնի արտաքին գործերի նախարարների հետ։ Այս մասին տեղեկացնում է ՀՀ ԱԳՄԱ նախարարությունը։ Ըստ գերատեսչության` քննարկվել են երկկողմ համագործակցության, ներդրումների և տարածաշրջանային խաղաղության հարցեր։Լիբանանի ԱԳ նախարար Յուսեֆ Ռաջիի հետ հանդիպմանը Միրզոյանը քննարկել է առևտրատնտեսական և ներդրումային համագործակցության զարգացման, ինչպես նաև արհեստական բանականության ոլորտում փոխգործակցության հնարավորությունները։Կողմերն անդրադարձել են նաև Հարավային Կովկասում և Մերձավոր Արևելքում տեղի ունեցող զարգացումներին։ Միրզոյանն ընդգծել է տարածաշրջանային կայունությանն ուղղված միջազգային ջանքերին Հայաստանի աջակցությունը։Բահրեյնի ԱԳ նախարար Աբդ Ալ-Լատիֆ բին Ռաշիդ Ալ-Զայանիի հետ քննարկվել են երկկողմ հարաբերությունների ընդլայնումը, ներդրումների խրախուսումը, զբոսաշրջության ակտիվացումը և համաձայնեցման փուլում գտնվող միջազգային պայմանագրերի կնքումը։Անդրադարձ է կատարվել նաև տարածաշրջանային խաղաղության ամրապնդմանն ու տնտեսական փոխկապակցվածության զարգացմանը, ինչպես նաև «Մանամայի երկխոսություն» և «Երևանյան երկխոսություն» դիվանագիտական ֆորումների համագործակցությանը։Հիշեցնենք, որ «Մանամայի երկխոսություն» անվտանգության 22-րդ միջազգային համաժողովն անցկացվում է Բահրեյնում հոկտեմբերի 30-ից նոյեմբերի 1-ը։ ՀՀ արտաքին գործերի և միջազգային առևտրի նախարար Արարատ Միրզոյանը հոկտեմբերի 30-ին աշխատանքային այցով մեկնել է Բահրեյն՝ մասնակցելու համաժողովին։Հոկտեմբերի 31-ին նա մասնակցել է համաժողովի պաշտոնական բացման արարողությանը։