Իսրայելի նախագահ Իցհակ Հերցոգը երկրի հիմնական քաղաքական ուժերին կոչ է արել անել հնարավորը՝ խորհրդարանական կրկնակի ընտրություններից խուսափելու համար։ Նա այս հայտարարությունն արել է նախօրեին կայացած Քնեսեթի՝ խորհրդարանի ընտրությունների արդյունքներից հետո։ Նախնական գնահատականներով՝ ոչ մի կուսակցություն կամ դաշինք բավարար թվով մանդատներ չի ստացել՝ կայուն մեծամասնություն ձևավորելու համար։ Կրկնակի ընտրությունների անցկացումը հնարավոր է, եթե կուսակցություններից ոչ մեկին չհաջողվի ձևավորել կառավարող կոալիցիա։ «Պետք է անել հնարավոր ամեն ինչ, հատկապես երեկվանից հետո, կրկնակի ընտրություններից խուսափելու համար»,- ասել է Հերցոգը։ Նրա ելույթի տեսագրությունը հրապարակվել է X սոցիալական ցանցի էջում։ Խոսելով կառավարող կոալիցիայի ձևավորման հարցով կուսակցությունների առաջնորդների հետ առաջիկա խորհրդակցությունների մասին՝ Հերցոգը հույս է հայտնել, որ գործընթացի բոլոր մասնակիցները ողջամիտ մոտեցում կցուցաբերեն։ «Ակնկալում եմ, որ բոլոր նրանք, ովքեր կգան այստեղ՝ նախագահի աշխատակազմ, կգան բաց սրտով»,- նշել է նա։