ԵՐԵՎԱՆ, 28 հոկտեմբերի – Sputnik․ ՀՀ վարչապետ Նիկոլ Փաշինյանն այսօր կառավարությունում հյուրընկալել է Սաուդյան Արաբիայի Թագավորության արքայազն Աբդուլազիզ բին Թալալ Ալ Սաուդի գլխավորած պատվիրակությանը։ Ինչպես հայտնում է վարչապետի մամուլի ծառայությունը, Փաշինյանը կարևորել է Արքայազն Թալալի անվան մարդկային զարգացման միջազգային մրցանակի այս տարվա մրցանակաբաշխության արարողությունը մեր երկրում անցկացնելը։Իր հերթին Սաուդյան Արաբիայի Թագավորության արքայազնը խոսել է հայաստանյան իր այցելություններից ստացած տպավորության մասին և իր հերթին ընդգծել մրցանակաբաշխությունը Հայաստանում անցկացնելու կարևորությունը։«Սա վերջին երկու տարվա ընթացքում իմ երկրորդ այցն է Հայաստան։ Անկեղծ ասած, ամեն անգամ, երբ այցելում եմ Հայաստան, ցանկություն է առաջանում կրկին այցելել։ Փորձում եմ այնպես անել, որ իմ կինն ու ընտանիքը նույնպես այցելեն Հայաստան, ոչ թե ուղղակի ծանոթանալու երկրին, հիանալի մշակույթին ու դարավոր պատմությանը, այլ նաև նախանշելու այն նախագծերը, որոնք կարող ենք համատեղ իրականացնել Հայաստանում»,- ասել է արքայազնը։Զրուցակիցները քննարկել են Հայաստան–Սաուդյան Արաբիա հարաբերությունների հետագա զարգացման հեռանկարները, կարևոր դիվանագիտական հարաբերությունների հաստատման փաստը և համոզմունք հայտնել, որ այն նոր ազդակ կհաղորդի տարբեր ոլորտներում փոխգործակցության զարգացմանն ու կապերի ընդլայնմանը։ Մտքեր են փոխանակվել նաև Հայաստանում ներդրումային նախագծերի իրականացման հնարավորությունների շուրջ։Հանդիպման ընթացքում խոսվել է նաև տարածաշրջանային հարցերի, Հայաստանի և Ադրբեջանի միջև խաղաղության հաստատման կարևորության մասին։Հիշեցնենք, որ այսօր երեկոյան «Դվինում» կանցկացվի Արքայազն Թալալի անվան մարդկային զարգացման միջազգային 27-րդ մրցանակաբաշխության հանդիսավոր արարողությունը։ Այդ նպատակով եռօրյա պաշտոնական այցով Հայաստանում է նաև Իսպանիայի թագուհի Սոֆիան։