ԵՐԵՎԱՆ, 27 հոկտեմբերի – Sputnik. Որքան շատ լինեն դոնորները և շահառուները անհետ կորածների ճակատագրերը պարզելու գործում, այնքան շատ կլինեն պատասխան պահանջողները։ Sputnik Արմենիայի հետ զրույցում ասաց փաստաբան, անհետ կորած փոխգնդապետ Հրանտ Պապիկյանի զարմուհի Տաթևիկ Սողոյանը` մեկնաբանելով Նիդեռլանդների հետ համագործակցության նոր փուլի մասին պաշտոնական հայտարարությունը։Հոկտեմբերի 27-ին Նիդեռլանդների արտգործնախարար Թոմ Բերենդսենը Երևանում հայտարարել է, որ իր երկիրը ֆինանսական օգնություն կտրամադրի անհետ կորածների ճակատագրերը պարզելու համար՝ չհստակեցնելով չափը։ Նախօրեին հոլանդացի պաշտոնյան նույնաբովանդակ հայտարարությամբ էր հանդես եկել նաև Բաքվում։Գործընթացին ներգրավված կողմերի ավելացումը, նրա խոսքով, հույս է ներշնչում, որ այն մի քայլ առաջ կգնա, կամ, ինչպես մեր զրուցակիցն է ասում՝ «գոնե 1 անհետ կորածի ճակատագիր կպարզվի», քանի որ այդ դերակատարները կողմերից նաև հաշվետվողականություն են պահանջելու։Սողոյանը կարևոր է համարում, որ կողմերը չսահմանափակվեն մասունքների փոխանակմամբ, այլ շարունակեն նաև անհատական քննությունները՝ ներառելով որոնողական աշխատանքները, հնարավոր թաղման վայրերում մասունքների որոնման շուրջ բանակցությունները, պատշաճ քննություն իրականացնեն՝ պարզելու հատկապես բռնի անհետացածների ճակատագիրը։Ինչ վերաբերում է Նիդեռլանդների` որպես երրորդ երկրի մասնակցությանը այդ գործընթացին, Սողոյանը հիշեցրեց, որ այդ երկրի աջակցության շնորհիվ է, որ Անհայտ կորած անձանց միջազգային կազմակերպությունը (ICMP) 2022-ին ծավալուն զեկույց էր պատրաստել` ՀՀ–ում ու Ադրբեջանում կատարած իրեննց հետազոտությունների արդյունքներով։ Զեկույցը, սակայն, ինչ–ինչ հանգամանքներում, հրապարակվելուց հետո հեռացվել էր կազմակերպության պաշտոնական կայքից։ Փաստաբանը հույս ունի, որ կակտիվանան հատկապես անհետ կորած անձանց ԴՆԹ նույնականացումների, չնույնականացված մասունքների ռեեստրի վարման աշխատանքները, որոնք, իր տպավորությամբ, փակուղի են մտել։Հիշեցնենք` պաշտոնական տվյալներով՝ 1988-ից 2005 թվականներին հայկական կողմից անհետ կորել է 437 մարդ, որոնցից 224-ը զինծառայող են, 213-ը՝ խաղաղ բնակիչ։ 191 մարդ համարվում է անհետ կորած 2020 թվականի 44-օրյա պատերազմի ընթացքում։ Իսկ 2023 թվականի սեպտեմբերին` Արցախի դեմ ադրբեջանական ագրեսիայից անմիջապես հետո, Ստեփանակերտի նավթամթերքի պահեստում տեղի ունեցած պայթյունից հետո էլ անհետ կորած է համարվում 22 մարդ։