Ազգային ժողովում «Թրամփի ուղի» (TRIPP) համաձայնագրի քննարկման ժամանակ ելույթ ունեցավ Էդգար Ղազարյանը՝ խիստ քննադատության ենթարկելով նախագիծն ու ՀՀ արտաքին գործերի նախարար Արարատ Միրզոյանին։ Ղազարյանն իր ելույթը սկսեց հեգնական դիտարկմամբ՝ Արարատ Միրզոյանին շնորհավորելով TRIPP-ի ֆեյսբուքյան էջի գործարկման կապակցությամբ։ Նա դա անվանեց նախարարի պաշտոնավարման շրջանի «ամենամեծ ձեռքբերումը»։ Անդրադառնալով համաձայնագրում ամրագրված տարածքային ամբողջականության, ինքնիշխանության և իրավազորության սկզբունքներին՝ Ղազարյանն ասաց, որ, իր գնահատմամբ, ցանկացած միջպետական պայմանագիր ինքնին ենթադրում է այդ սկզբունքների պահպանումը։ «Դուք այնպես եք խորտակել մեր երկրի տարածքային ամբողջականությունն ու ինքնիշխանությունը, որ մի պայմանագրի հետ կապված այնտեղ դա գրել եք, հետն էլ դա ձեռքբերում եք համարում»,- հայտարարեց Ղազարյանը։ Նա նաև անդրադարձավ տարածաշրջանային հաղորդակցությունների ապաշրջափակման հարցին՝ պնդելով, որ համաձայնագրում որևէ դրույթ չկա, որով Ադրբեջանը պարտավորվում է Հայաստանի համար սահման բացել կամ այլ հաղորդակցային արտոնություններ տրամադրել։ Ղազարյանի խոսքով՝ փաստաթուղթը հիմնականում վերաբերում է Ադրբեջանի հիմնական մասը Նախիջևանի հետ կապող ենթակառուցվածքների ստեղծմանը կամ շահագործմանը։ Նա այդ համատեքստում հիշատակեց երկաթուղին, ավտոճանապարհները, էլեկտրահաղորդման գծերը, ինչպես նաև գազատար և նավթատար ենթակառուցվածքները։ «Ընդամենը Ադրբեջանին տարածք եք հանձնում, Հայաստանի տարածքը հանձնում եք, ընդ որում՝ միայն Մեղրին չէ այստեղ, միայն երկաթգիծը չէ»,- ասաց նա։ Ելույթի ընթացքում Ղազարյանը քննադատեց նաև Արարատ Միրզոյանի՝ նախագծի վերաբերյալ ներկայացրած պարզաբանումները։ Նրա խոսքով՝ հանձնաժողովի նիստերի ընթացքում պարզ դարձավ, որ նախարարը չի տիրապետում նախագծի հետ կապված մի շարք մանրամասների և չի կարողանում պատասխանել պատգամավորների կոնկրետ հարցերին, մասնավորապես՝ ճանապարհների և էլեկտրահաղորդման գծերի աշխարհագրական տեղակայման վերաբերյալ։ Ելույթի ավարտին Ղազարյանը դիմեց «Քաղաքացիական պայմանագիր» խմբակցության պատգամավորներին՝ հիշեցնելով, որ Ազգային ժողովի նիստերը, ելույթներն ու անվանական քվեարկությունները սղագրվում են և պահպանվում են։ Մանրամասները՝ տեսանյութում։ Եվգենյա Համբարձումյան