Քութայիսիում պաշտոնապես բացվել է երկրում առաջին TUMO կրթական կենտրոնը, որը ստեղծվել է՝ հիմք ընդունելով դեռահասներին ժամանակակից տեխնոլոգիաներ և թվային հմտություններ ուսուցանելու հայկական մոդելը։ Կենտրոնը տեղակայվել է Քութայիսի տեխնոլոգիական հաբում, որը գտնվում է Վրաստանի խորհրդարանի նախկին շենքում։ Պաշտոնական բացումը տեղի է ունեցել 2026 թվականի հոկտեմբերի 8-ին։ Վրաստանի էկոնոմիկայի և կայուն զարգացման նախարարության տվյալներով՝ կենտրոնի կրթական ծրագրերին գրանցվել է 12-18 տարեկան շուրջ 1550 դեռահաս։ Նրանցից 600-ն արդեն սկսել է հաճախել դասերին։ Կենտրոնում դեռահասները հնարավորություն ունեն ուսումնասիրելու ծրագրավորում, ռոբոտաշինություն, գրաֆիկական դիզայն, անիմացիա և ժամանակակից տեխնոլոգիաների ու թվային ստեղծարարության հետ կապված այլ ուղղություններ։ TUMO Kutaisi-ի բացումը Վրաստանում TUMO կրթական մոդելի ընդլայնման առաջին քայլն է։ Կենտրոնը նպատակ ունի զարգացնել երիտասարդների տեխնիկական և ստեղծագործական հմտությունները և պատրաստել դեռահասներին թվային տնտեսության ոլորտում աշխատանքին։