ԵՐԵՎԱՆ, 9 նոյեմբերի – Sputnik. ՀՀ մարդու իրավունքների պաշտպան Անահիտ Մանասյանը անհնարին չի համարում Բաքու մեկնելն և այնտեղ պահվող հայ գերիներին այցելելու հնարավորությունը, սակայն կասկածի տակ է դնում նման այցի արդյունավետությունը։ Այս մասին նա հայտարարեց ԱԺ-ում լրագրողների հետ զրույցում։Ավելի վաղ հայտնել էինք, որ Ադրբեջանում 20 տարվա ապօրինի ազատազրկման դատապարտված Ռուբեն Վարդանյանն ընտանիքի հետ հեռախոսազրույցի միջոցով հայտնել էր, որ զրուցել է Ադրբեջանի օմբուդսման Սաբինա Ալիևայի հետ, որն ասել է` Հայաստանի ՄԻՊ Անահիտ Մանասյանի հետ քննարկել է նրա՝ Բաքու այցելելու հնարավորությունը։ Ադրբեջանական կողմը պատրաստակամություն է հայտնել նպաստել այցի կազմակերպմանը։ Ռուբեն Վարդանյանն ուղերձով դիմել էր Մանասյանին` խնդրելով դիտարկել նրա, իր կնոջ՝ Վերոնիկա Զոնաբենդի և մյուս հայ բանտարկյալների հարազատների այցը Բաքու։ Ավելի ուշ ՀՀ մարդու իրավունքների պաշտպան Անահիտ Մանասյանը հայտարարեց, որ Բաքու այցելելու պաշտոնական առաջարկ չի ստացել։ Միաժամանակ նաև հայտնեց, որ ՀՀ ՄԻՊ–ը պետության անունից չի կարող և չի վարում բանակցություններ, չի իրականացնում պետության արտաքին քաղաքականություն։Նրա խոսքով՝ ՄԻՊ-ը միայն Հայաստանում ունի մարդու իրավունքների խախտումների վերացման ուղղությամբ համապատասխան լիազորություններ, մինչդեռ այլ պետության քրեակատարողական հիմնարկ այցելելիս չի կարող պահանջել բացահայտել կամ վերացնել արձանագրված խնդիրները։«Այս պայմաններում, բնականաբար, չեմ կարծում, որ սա ռացիոնալ տրամաբանություն ունի»,– ասաց Մանասյանը։Միաժամանակ նա ընդգծեց, որ Բաքվում պահվող հայ գերիների հարցը բարձրացնում է միջազգային բոլոր հարթակներում, որոնց մասնակցում է։Մանասյանի խոսքով՝ հենց այդ գործունեության համատեքստում որոշ արտաքին դերակատարներ փորձում են հասնել նրան, որ Հայաստանը որոշ միջազգային հարթակներում, օրինակ` ՄԱԿ–ում, զրկվի համապատասխան կարգավիճակից։Հիշեցնենք, որ ՀՀ մարդու իրավունքների պաշտպանի հաստատությունն ունի միջազգային ամենաբարձր՝ «A» կարգավիճակ, որը շնորհվում է Մարդու իրավունքների ազգային հաստատությունների գլոբալ դաշինքի (GANHRI) կողմից։ Այն հաստատում է կառույցի համապատասխանությունը ՄԱԿ-ի «Փարիզյան սկզբունքներին» և հնարավորություն տալիս անկախ զեկույցներով ու ելույթներով հանդես գալ ՄԱԿ-ի Մարդու իրավունքների խորհրդում, ինչպես նաև մասնակցել միջազգային իրավապաշտպան գործընթացներին։