Հաւաքական անվտանգութեան պայմանագիրի կազմակերպութեան (ՀԱՊԿ) հետ կապուած Հայաստանի իշխանութիւններուն շահերը սպառած են։ Այս մասին յայտարարած է Հայաստանի վարչապետ Նիկոլ Փաշինեան՝ կառավարութեան մէջ լրագրողներու հետ ունեցած զրոյցի ընթացքին։ Ան ընդգծած է, որ կ՚ուզէ վերջնականապէս արձանագրել, թէ Հայաստանի հետաքրքրութիւնը ՀԱՊԿ-ի նկատմամբ սպառած է։ Յայտարարութիւնը կը յաջորդէ ՀԱՊԿ-ի ընդհանուր քարտուղար Թաալաթպէկ Մասատիկովի այն խօսքերուն, թէ Հայաստանի կազմակերպութենէն հեռացման հարց չկայ, սակայն Նոյեմբերին Մոսկուայի մէջ կայանալիք նիստին կրնայ քննարկուիլ կազմակերպութեան կանոնադրութեան 25-րդ յօդուածը Հայաստանի նկատմամբ կիրարկելու հարցը։ Այդ պարագային Հայաստան կրնայ զրկուիլ ձայնի իրաւունքէն եւ կազմակերպութեան պաշտօններուն մէջ թեկնածուներ առաջադրելու կարելիութենէն՝ մինչեւ անդամավճարներու պարտքի մարումը։ Նշենք, որ Հայաստան 2024-ի Փետրուարէն սառեցուցած է իր մասնակցութիւնը ՀԱՊԿ-ի աշխատանքներուն, չի մասնակցիր կազմակերպութեան ձեռնարկներուն եւ չի վճարեր անդամավճարները։