ԵՐԵՎԱՆ, 6 նոյեմբերի – Sputnik. Սոցիալական ծախսերն ավելացնելու համար է կառավարությունը գումարներ վերաբաշխել բյուջեի մյուս ոլորտներից, ինչը կարող է ծանր հետևանքներ ունենալ Հայաստանի տնտեսության համար։ Sputnik Արմենիայի հետ զրույցում նման տեսակետ հայտնեց ՊԵԿ նախկին նախագահ Դավիթ Անանյանը:Ինչպես հայտնել ենք, ՀՀ էկոնոմիկայի նախարար Գևորգ Պապոյանն այսօր ԱԺ–ում ասաց, որ 2027 թվականի բյուջեով արտահանման աջակցության ֆինանսավորումը 2,1 միլիարդից կկրճատվի՝ հասնելով 1 միլիարդ դրամի։«Փոխանակ խթանելու տնտեսության արտահանման ներուժը՝ կառավարությունը նախապատվությունը տալիս է ընթացիկ սոցիալական ծախսերի ֆինանսավորմանը։ Սոցիալական և առողջապահական ոլորտներին հատկացվող գումարները միլիարդավոր դրամներով ավելացել են, քանի որ կառավարությունը կատարում է նախընտրական շրջանում տված իր քաղաքական խոստումները», - ասում է Անանյանը։Ըստ ՊԵԿ նախկին նախագահի` 2027 թվականի բյուջեով սոցիալական և առողջապահական ոլորտների ծախսերի միլիարդավոր դրամները պետք է ֆինանսավորվեն երկու աղբյուրից՝ հարկային եկամուտների ավելացման և բյուջեի ներքին վերաբաշխումների հաշվին։ Անանյանի խոսքով, սակայն, հարկային եկամուտների ավելի մեծ աճ պլանավորել հնարավոր չէ, քանի որ տնտեսությունը չունի այդքան եկամուտներ գեներացնելու ներուժ։ Հետևաբար, ըստ նրա,կառավարությունն ավելի հեշտ ճանապարհ է ընտրում՝ գումարները մի ծախսային հոդվածից տեղափոխել մյուսը։Նրա խոսքով` երբ ինչ–որ մեկը տնտեսական գնահատականներ է հնչեցնում, պետք է հաշվի առնել ոչ միայն նրա մասնագիտական պատրաստվածությունն ու տեղեկությունների արժանահավատությունը, այլև դրդապատճառները՝ նա հանդես է գալիս որպես տնտեսության կառավարի՞չ, թե՞ քաղաքական թիմի ներկայացուցիչ։«Այս դեպքում պատասխանատուն (Գևորգ Պապոյանը–խմբ.) խոսում է ոչ թե որպես տնտեսության կառավարիչ, այլ որպես քաղաքական թիմի անդամ, ուստի նրա խոսքը չի կարող բավարար չափով անկեղծ և արժանահավատ լինել։ Այդ պատճառով էլ ասում եմ, որ այս խոսույթը քաղաքական փաթեթավորում ունի»,– նշել է Անանյանը։ԵՄ–ի հետ ՀՀ առևտրի աճի վերաբերյալ կանխատեսումները սպեկուլյատիվ բնույթ ունեն. ԵՎԳՆրա խոսքով՝ արտահանման աշխարհագրությունը հնարավոր չէ փոխել մեկ տարվա ընթացքում։ Նույնիսկ եթե ԵՄ-ի հետ ձեռք բերվի երկամյա մաքսային արտոնյալ ռեժիմ կամ ԱՄԷ-ի հետ` առևտրային հարաբերությունների վերաբերյալ պայմանավորվածություններ, դրանց գործնական արդյունքները, ըստ Անանյանի, տեսանելի կլինեն միայն տարիներ անց։Տնտեսագետի գնահատմամբ՝ արտահանման աշխարհագրության փոփոխությունը միջնաժամկետ գործընթաց է և կարող է տևել 6-7 տարի։ Անանյանը նշում է, որ նույնիսկ պետական աննախադեպ աջակցության պայմաններում արտահանման դիվերսիֆիկացիան էական ու արդյունավետ արդյունք է տալիս միայն տարիներ անց։Հիշեցնենք, որ ՀՀ կառավարության հոկտեմբերի 22-ի որոշմամբ Հայաստանում դադարեցվել է «Արտադրանքի հավաստագրման և լաբորատոր փորձարկումների ծախսերի փոխհատուցման» ծրագիրը։ Այն ընդունվել էր նոր արտերկրյա շուկաներում հայկական արտադրանքի արտահանումը խթանելու նպատակով՝ մասնակիորեն փոխհատուցելով հավաստագրման և լաբորատոր փորձարկումների համար կատարված ծախսերը։