Էդգար Շաթիրյանը հրաժարական է տվել Սահմանադրական դատարանի փոխնախագահի պաշտոնից, սակայն կշարունակի պաշտոնավարել որպես ՍԴ դատավոր։ «Հաշվի առնելով այն, որ փաստվեցին ձևավորված իրողությունները՝ ես անհնարին համարեցի իմ հետագա պաշտոնավարումը որպես Սահմանադրական դատարանի փոխնախագահ»,- ՍԴ նախագահի ընտրությունից հետո 24News -ի հետ զրույցում ասել է Շաթիրյանը։ Նրա խոսքով՝ կայացրած որոշումը միանգամայն տրամաբանական է։ Անդրադառնալով հնարավոր ճնշումների մասին հարցին՝ Շաթիրյանը նշել է, որ իրեն ճանաչողները կփաստեն՝ ինքը ճնշումների ենթարկվող անձ չէ։ «Ավելի քան 6 տարի պաշտոնավարում եմ որպես ՍԴ դատավոր, իմ գործունեության մասով երբևէ ճնշում չի եղել, չկա և չի կարող լինել»,- ասել է նա։ Շաթիրյանը նաև նշել է, որ ՍԴ նախագահի ընտրության արդյունքն իր համար անկանխատեսելի չէր։ «Արդյո՞ք սա էր 2020 թվականի հունիսին տեղի ունեցած Սահմանադրության փոփոխության վերջնանպատակը։ Ես չեմ ուզում հավատալ սրան անձնապես, բայց առկա իրողությունները ստիպում են հաշվի նստել դրանց հետ»,- նշել է նա։ The post Էդգար Շաթիրյանը հրաժարական է տվել ՍԴ փոխնախագահի պաշտոնից appeared first on Alphanews .