ԱԺ «Հայաստան» խմբակցության պատգամավոր Մեսրոպ Մանուկյանը, դիմելով էկոնոմիկայի նախարար Գևորգ Պապոյանին, քննադատել է կառավարության տնտեսական քաղաքականությունը՝ անդրադառնալով Ռուսաստանի հետ հարաբերություններին, գյուղատնտեսական արտադրանքի արտահանմանը, գյուղացիների խնդիրներին և գազի գնին։ «Ամենաշատը դուք և ձեր կառավարությունն եք հայտարարել, որ Ռուսաստանի հետ մոտ եք, Պուտինի հետ ամենաշատը դուք եք զանգում։ Եթե այդ հարաբերությունները լավ են, գազը չթանկանա՝ դրա պատասխանատուն էլ դուք եք։ Թանկացավ՝ դրա պատասխանատուն էլ դուք եք։ Հիմա գյուղմթերքը չի արտահանվում՝ դրա պատասխանատուն էլ դուք եք։ Ու՞մ վրա եք մեղքը բարդում, դա չեմ կարողանում հասկանալ»,- նշել է Մանուկյանը։ Ի պատասպան նախարարը նշել է՝ Հայաստանի և Ռուսաստանի միջև առևտրային հաշվեկշիռը ԵԱՏՄ-ին անդամակցելուց առաջ մոտ 700 միլիոն դոլարի էր, իսկ այժմ այն հասել է շուրջ 1 միլիարդ դոլարի բացասական ցուցանիշի։ Նա նաև նշել է, որ ԵՄ-ին անդամակցելիս մի շարք երկրներ ավելի մեծ աջակցություն են ստացել, քան իրենք են ներդրել միության մեջ՝ ընդգծելով, որ նույն սկզբունքով Հայաստանը ևս պետք է ավելի մեծ տնտեսական օգուտ ստանար ԵԱՏՄ-ից։ «Եթե գազի գինն այն է եղել, որ պետք է դրա փոխարեն էժան գազ ստանանք, ապա եկեք չասենք՝ էժան գազ։ Մենք փողի փոխարեն ստացել ենք բնամթերք։ Ինձ համար պետք է ընդունելի լինի ցանկացած ապրանքի համար վճարել փողով, ոչ թե ինքնիշխանությամբ։ Եթե ինչ-որ բանի գինը 100 դրամ է, պետք է վճարել 100 դրամ, ոչ թե 80 դրամ՝ գումարած 20 դրամի ինքնիշխանություն»,- հայտարարել է Պապոյանը։ The post Եթե գազի գինը բարձրացել է, դրա պատասխանատուն էլ դուք եք․ Մանուկյանը՝ Պապոյանին appeared first on Alphanews .