Գերմանիայի արտաքին գործերի նախարար Յոհան Վադեֆուլը խոստովանել է, որ Ուկրաինային փոխանցելու համար «Patriot» ՀՕՊ համակարգերի հրթիռները խիստ սահմանափակ են։ «Ինչ վերաբերում է «Patriot» համակարգերի հրթիռների մատակարարմանը, ապա դրանց իրականում շատ քիչ քանակություն կա»,- լրագրող Աննա Վիլի փոդքասթում ասել է նախարարը։ Նրա խոսքով՝ խնդիրը միայն ԱՄՆ-ին չի վերաբերում․ այլ երկրներ ևս ունեն պահուստներ, որոնք տարբեր պատճառներով չեն տրամադրում Ուկրաինային։ Վադեֆուլը նշել է, որ Գերմանիայի պաշտպանության նախարար Բորիս Պիստորիուսը մեծ ջանքեր է գործադրել՝ Բունդեսվերի պահեստներից հակաօդային պաշտպանության միջոցներ Ուկրաինային փոխանցելու համար։ Կիևը բազմիցս է հայտարարել ՀՕՊ համակարգերի համար հակահրթիռների պակասի մասին։ Հոկտեմբերի 15-ին CNN-ը, հղում անելով աղբյուրներին, հայտնել էր, որ Ուկրաինայի «Patriot» համակարգերի հրթիռների պաշարներն ամբողջությամբ սպառվել են։ Ավելի ուշ Վոլոդիմիր Զելենսկին դժգոհել էր Եվրամիության երկրների միջոցներով՝ PURL մեխանիզմի շրջանակում գնված ամերիկյան հակահրթիռների մատակարարման ուշացումներից։ Նա Պենտագոնի ղեկավար Փիթ Հեգսեթին մեղադրել էր «Patriot» և NASAMS համակարգերի հրթիռների մատակարարումը մեկ ամսով ուշացնելու մեջ։ Նոյեմբերի 2-ին Ուկրաինայի էներգետիկայի նախարարությունը հայտնել էր, որ նախորդ շաբաթ երկրում արձանագրվել է 208 միջադեպ, որոնց հետևանքով ոչնչացվել կամ վնասվել են էներգետիկ և նավթագազային ենթակառուցվածքների օբյեկտներ։ Վերջին շրջանում Ռուսաստանի պաշտպանության նախարարությունը պարբերաբար հայտնում է Ուկրաինայի էներգետիկ համալիրի այն օբյեկտներին հասցված հարվածների մասին, որոնք էլեկտրաէներգիա են մատակարարում ռազմական ձեռնարկություններին։