Թեքեյան կենտրոնի սրահում «Վահան Թեքեյան» ամենամյա մրցանակաբաշխության «Կերպարվեստ» անվանակարգում ներկայացված ստեղծագործություններ են ցուցադրված։ Հանձնաժողովը դիտել է տարբեր նկարիչների աշխատանքներն ու ընտրել հաղթող ստեղծագործությունը, որը Սուրեն Սաֆարյանի «Լության ռիթմեր» կտավն է։ Սուրեն Սաֆարյանն արժանացավ «Վահան Թեքեյան» մրցանակի։ 1992 թվականից Հայաստանում անց է կացվում «Վահան Թեքեյան» ամենամյա մրցանակաբաշխությունը՝ խրախուսելու Հայաստանի, Արցախի, Սփյուռքի մտավորականներին, արվեստագետներին, ստեղծագործողներին։ Մրցանակաբաշխությունն սկսվեց աղոթքով և Ամենայն հայոց կաթողիկոս Գարեգին Երկրորդի օրհնությամբ, որը ներկաներին փոխանցեց Հայր Ասողիկը։ «Վահան Թեքեյան» մրցանակաբաշխությունն այս տարի անց է կացվել Գրականություն, Հայագիտություն և Կերպարվեստ անվանակարգերում: Հայաստանում Ֆրանսիայի նախկին դեսպան Անրի Կյունին միշտ աչքի է ընկել հայ մշակույթի ու Հայաստանի նկատմամբ իր առանձնահատուկ վերաբերմունքով։ «Մահ գոյություն չունի» վերնագրով վեպ է գրել Կոմիտասի մասին, որն արժանացավ «Վահան Թեքեյան» մրցանակի։ Հայագիտություն անվանակարգում հանձնաժողը լավագույն աշխատանք է ճանաչել Արտակ Մաղալյանի «Արցախի մելիքությունները 17-19-րդ դարերում» աշխատությունը։ «Վահան Թեքեյան» մրցանակաբաշխության կազմակերպիչներն իրենց ուշադրության կենտրոնում են պահում Հայաստան-Սփյուռք կամուրջը և այդ կապն ամրացնող մարդկանց ու կառույցները։ Հայապահպանության, ազգային արժեքների տարածման և Հայաստան–Սփյուռք կապերի ամրապնդման գործում նշանակալի ներդրման համար Հատուկ մրցանակի արժանացավ The Armenian Mirror-Spectator թերթը։ Ալին Գրիգորյանը ներկայացրեց թերթի ստեղծման պատմությունը, որի հիմքում Սփյուռքի գաղթօջախները միմյանց կապելու, սփյուռքահայերին համախմբելու գաղափարն էր։ «Վահան Թեքեյան» մրցանակաբաշխությունն ամեն տարի մշտադիտարկում է մտավոր, հոգևոր, մշակութային ստեղծագործությունները, որպես գնահատանք՝ մրցանակով խրախուսում լավագույններին, որպեսզի հայանպաստ, ազգանվեր գործունեությունը դառնա վարակիչ և փոխանցվի հաջորդ սերունդներին։ Անրի Կյունին ուսումնասիրել է ոչ միայն Կոմիտասի, այլ նաև Վահան Թեքեյանի կյանքն ու ստեղծագործությունը։ Մրցանակաբաշխության ավարտին ցուցադրվեց «Շուշի. անհերքելի փաստեր» վավերագրական ֆիլմի 4-րդ մասը։ The post «Վահան Թեքեյան» մրցանակաբաշխություն. 2025 թվականի հոգևոր «հունձքը» appeared first on Ազգ .