ՌԴ ԱԳՆ պաշտոնական ներկայացուցիչ Մարիա Զախարովան Եվրամիության արտաքին գործերի և անվտանգության քաղաքականության հարցերով բարձր ներկայացուցիչ Կայա Կալլասին անվանել է «խրտվիլակ ԵՄ-ի գեղեցիկ այգում»։ Այսպես է Զախարովան արձագանքել Կալլասի հայտարարությանը, որով վերջինս դեմ է արտահայտվել Ռուսաստանի նախագահ Վլադիմիր Պուտինին Մայամիում կայանալիք G20-ի գագաթնաժողովին հրավիրելուն։ «Գիտե՞ք, Կալլասը դարձել է մի տեսակ խրտվիլակ «ԵՄ-ի գեղեցիկ այգում»։ Սովորաբար խրտվիլակները դնում են թռչուններին վախեցնելու համար, որպեսզի նրանք չկտցահարեն բերքը։ Բայց Եվրամիությունում վաղուց բերք չկա՝ սեփական անճարակ այգեպանների պատճառով, որոնք մի քանի տարի շարունակ ոչնչացրել են իրենց իսկ հողատարածքները։ Իսկ Կալլասի խրտվիլակը շարունակում է վախեցնել իր հայտարարություններով՝ աննպատակ և հիմարաբար»,- «Կոմսոմոլսկայա պրավդա»-ին տված հարցազրույցում ասել է Զախարովան։ ՌԴ ԱԳՆ ներկայացուցիչը նաև ընդգծել է, որ ոչ ոք Կալլասից խորհուրդ չի հարցրել G20-ի հանդիպման կազմակերպման վերաբերյալ, և նրա կարծիքն այդ հարցում ոչ մեկին հետաքրքիր չէ։ —00—ՍՊ The post «Կալլասը դարձել է խրտվիլակ ԵՄ-ի գեղեցիկ այգում»․ Զախարովան՝ եվրոպական դիվանագիտության ղեկավարի մասին appeared first on 24News .