ԱՄՆ-ը, Հարավային Կորեան և Ճապոնիան վերահաստատել են իրենց հանձնառությունը Հյուսիսային Կորեայի լիակատար ապամիջուկայնացմանը՝ ԱՄՆ նախագահ Դոնալդ Թրամփի և Հյուսիսային Կորեայի առաջնորդ Կիմ Չեն Ընի հնարավոր հանդիպման շուրջ քննարկումների ֆոնին, հայտնում է AFP-ն։ Փհենյանը շարունակում է մերժել միջուկային զենքից հրաժարվելը՝ չնայած բանակցությունները վերսկսելու Վաշինգտոնի փորձերին։ ԱՄՆ պետքարտուղար Մարկո Ռուբիոն, Հարավային Կորեայի արտաքին գործերի նախարար Չո Հյոնը և Ճապոնիայի ԱԳՆ ղեկավար Տոսիմիցու Մոտեգին վերահաստատել են իրենց ընդհանուր դիրքորոշումն ուրբաթ օրը Ջորջիա նահանգի Ատլանտա քաղաքում G20-ի արտաքին գործերի նախարարների հանդիպման շրջանակում կայացած բանակցությունների ընթացքում, հայտնել է ԱՄՆ Պետդեպարտամենտը։ Կողմերը նաև պարտավորվել են հասնել ՄԱԿ-ի Անվտանգության խորհրդի բանաձևերի լիակատար կատարմանը, այդ թվում՝ Հյուսիսային Կորեայի միջուկային և հրթիռային ծրագրերի ֆինանսավորումը կասեցնելուն ուղղված սահմանափակումների պահպանմանը։ Թրամփի և Կիմ Չեն Ընի հնարավոր հանդիպումը քննարկվում է Ասիա-խաղաղօվկիանոսյան տնտեսական համագործակցության (ԱԽՏՀ) գագաթնաժողովին ընդառաջ, որը կկայանա հաջորդ ամիս Չինաստանում։ Թրամփը բազմիցս պատրաստակամություն է հայտնել վերսկսելու Փհենյանի հետ բանակցությունները միջուկային խնդրի շուրջ։ Ռուսաստանի և Չինաստանի աջակցությունը վայելող Հյուսիսային Կորեան, չնայած ՄԱԿ-ի բազմամյա պատժամիջոցներին, օրենսդրորեն ամրագրել է միջուկային տերության իր կարգավիճակը։ Երկրի ղեկավարությունը բազմիցս հայտարարել է, որ միջուկային զինանոցը մշտական է, և դրանից հրաժարվելու հարցը քննարկման ենթակա չէ։ԱՄՆ-ն,