Իրանը դեռ չի պատասխանել ԱՄՆ փոխնախագահ Ջեյ Դի Վենսի նամակին, որն ուղղված էր Իրանի Ազգային անվտանգության գերագույն խորհրդի քարտուղարին։ Այս մասին հայտնել է իրանական Tasnim գործակալությունը։ Գործակալության տվյալներով՝ իրանական կողմը ստացել է նամակը, սակայն դեռ չի պատասխանել դրան։ Թեհրանը պնդում է, որ Վաշինգտոնը պետք է կատարի Իրանի ներկայացրած յոթ պայմանները, և անընդունելի է համարում ցանկացած դիրքորոշում, որը հակասում է իր այս վերջնական մոտեցմանը։ Մեկ օր առաջ The Wall Street Journal-ը հայտնել էր, որ Ջեյ Դի Վենսը նամակ է ուղարկել Իրանի Ազգային անվտանգության գերագույն խորհրդի քարտուղար Մոհսեն Ռեզայիին՝ փորձելով վերսկսել բանակցությունները Իսլամական Հանրապետության հետ՝ հակամարտության կարգավորման շուրջ։