factor.am Ազգային ժողովը վավերացրեց «Թրամփի ուղի՝ հանուն միջազգային խաղաղության և բարգավաճման» նախագծի (TRIPP) վերաբերյալ ռազմավարական համագործակցության մասին շրջանակային համաձայնագիրը։ Հարցին կողմ քվեարկեց 63, դեմ՝ 33, ձեռնպահ՝ 0 պատգամավոր։ Համաձայնագրի առանցքային դրույթներն են. – ստեղծվելու է «TRIPP զարգացման ընկերություն»՝ Հայաստանի և ամերիկյան կողմի համատեղ ձեռնարկություն։ Առաջին փուլում ԱՄՆ կողմը կունենա 74%, Հայաստանը՝ 26% բաժնեմաս։ Նախնական ժամկետը 49 տարի է, իսկ ևս 50 տարով երկարաձգելու դեպքում Հայաստանի բաժնեմասը նախատեսվում է հասցնել 49%-ի, ԱՄՆ-ինը՝ 51%-ի։ – Հայաստանը ընկերությանը տրամադրելու է TRIPP-ի համապատասխան տարածքներում 49 տարվա բացառիկ հողօգտագործման, զարգացման և անհրաժեշտ այլ իրավունքներ։ Ժամկետի ավարտին մնացած իրավունքները պետք է անվճար վերադառնան Հայաստանին։ – առանձին ենթակառուցվածքային ծրագրերի համար կարող են ստեղծվել հատուկ նշանակության ընկերություններ, որոնք կընտրեն կոնցեսիոներների, օպերատորների, շինարարների և այլ մասնակիցների։ – Հայաստանը պարտավորվում է նպաստել անհրաժեշտ օրենսդրական փոփոխությունների, թույլտվությունների և կարգավորումների ընդունմանը, իսկ որոշ հարցերում նախատեսվում են շեղումներ բաժնետիրական ընկերությունների, գնումների և ՊՄԳ-ի գործող կարգավորումներից։ – ԱՄՆ-ը նախատեսում է աջակցել նախագծերի ֆինանսավորման ներգրավմանը՝ պետական կամ մասնավոր աղբյուրներից, սակայն դա ձևակերպված է որպես մտադրություն և կախված է միջոցների առկայությունից ու համապատասխան ընթացակարգերից։ The post ԱԺ-ն վավերացրեց TRIPP-ի վերաբերյալ ռազմավարական համագործակցության համաձայնագիրը | factor.am appeared first on Infocom .