«Ուժեղ Հայաստան» կուսակցության առաջնորդ Սամվել Կարապետյանը համոզված է, որ իշխանությունը արտահերթ ընտրությունների չի գնա: «Ինքը, որ դնես գլխին, գնդակահարես՝ չի գնա արտահերթ ընտրության: Մեկ միլիարդ դոլար ծախսելով հազիվ կարողացավ 49 % ձայն հավաքել»,- հայտարարեց Սամվել Կարապետյանը: Այնուամենայնիվ, եթե իրադարձություններն այդ սցենարով զարգանան, Կարապետյանի քաղաքական ուժը կրկին մասնակցելու է ընտրություններին: «Մենք կմասնակցենք, կհաղթենք»,- ասաց Կարապետյանը, որը, հիշեցնենք, ԱԺ հերթական ընտրություններից առաջ ևս համոզված էր, որ իրենք հաղթելու են: Խոսելով Ստեփանավանում «Ուժեղ Հայաստանի» թեկնածուի նկատմամբ քրեական հետապնդման մասին, Կարապետյանը պնդեց, որ ընտրակաշառք չի բաժանվել, իսկ տարածված տեսանյութում երևացող գումարը եղել էր ընտրական ծախսերի համար հատկացված գումար: «Չե՞ք ամաչում այս տեսագրությունը տեսնելուց: Ընտրակաշառք չի բաժանվել, իրենք ձերբակալել են թիմի բոլոր անդամներին: Եթե ընտրակաշառք բաժանած լինեին, վերցնողներին էլ կձերբակալեին»,- ասաց Կարապետյանը՝ պնդելով, որ նախընտրական շրջանում բազմաթիվ ծախսեր կան կատարելու: «Մարդը գրպանից ընտրական ծախսերի գումար է տվել, օրինակ՝ գովազդների, գյուղեր մեկնելու համար ավտոբուս վարձելու»,- ասաց Կարապետյանը: «Այս դեպքում իմչո՞ւ է ծածուկ արվում այդ ամենը»,- հարցրեց լրագրողներից մեկը, ինչին ի պատասխան Կարապետյանը պատասխանեց. «Մարդը ամաչել է վերցնի, ասաց՝ դիր ջեբդ» Մանրամասները՝ տեսանյութում։ Արաքս Մամուլյան