Ռուսական զորքերը հոկտեմբերի 26-ի երեկոյից կրկին զանգվածային հարվածներ են հասցրել Կիևին։ Մեկ մարդ զոհվել է, ևս 15-ը՝ վիրավորվել, որոնցից ինը հոսպիտալացվել են, գրում է Current time-ը։ Կիևի քաղաքապետ Վիտալի Կլիչկոյի խոսքով՝ Պոդոլսկի շրջանում հարվածների հետևանքով վնասվել են վարչական և ոչ բնակելի շենքեր, Դնեպրի շրջանում՝ երկու բուժհաստատություն և ոչ բնակելի շինություն, իսկ Դեսնյանսկի շրջանում՝ համալսարանի հանրակացարան։ Ուկրաինայի արտակարգ իրավիճակների պետական ծառայության հաղորդմամբ՝ վնասվել են նաև համալսարանի մասնաշենքը, բնակելի տներ և երեք ավտոմեքենա։ Օբոլոնսկի շրջանում երկու ոչ բնակելի շենքում հրդեհ է բռնկվել։ Ռուսական զորքերը նաև հարվածել ու վնասել են Հարավային կամրջի և մետրոպոլիտենի ենթակառուցվածքը։ Բացի այդ, վնասվել են Դարնիցա և Չեռնիգովսկա կայարաններից ու Լիսովա կայարանից ելքերի միջև ընկած հատվածները։ Կամրջի երթևեկությունը ներկայում սահմանափակ է, իսկ կանաչ գծի վրա գտնվող Օսոկորկի և Կրասնի Խուտոր կայարանների միջև գնացքների երթևեկությունը դադարեցվել է։ Ռուսաստանի Պաշտպանության նախարարությունը հայտարարել է, որ Կիևում հարվածներ են հասցվել արդյունաբերական ձեռնարկությանը, անօդաչու թռչող սարքերի հավաքման արտադրամասին՝ «Օակլայն» ՍՊԸ-ին, ԱԹՍ-ների հավաքման մեկ այլ արհեստանոցի և Հարավային կամրջի ուղղությամբ։ Նշվում է, որ Խարկովի մարզում խոցվել է ընկերություններից մեկի բեռնաթափման և մաքսային տերմինալը, իսկ Սև ծովում՝ Օդեսայի մարզի Չեռնոմորսկ նավահանգիստ ուղևորվող բեռնատար նավը։ Թարգմանությունը՝ Էմմա Չոբանյանի