Առաջիկա մի քանի տարիների ընթացքում Հայաստանի իշխող Քաղաքացիական պայմանագիր կուսակցությունը կաշխատի կրճատել ձայների իր բաժինը: Այս պարադոքսալ խոստումը տվել է Նիկոլ Փաշինյանը՝ տեղական ինքնակառավարման մարմինների ընտրությունների արդյունքները վերլուծելուց հետո: Նա հայտարարել է, որ 90% աջակցությունը կարող է ստեղծել բռնապետության տպավորություն: Սակայն, նրան դուր չի գալիս ներկայիս ընդդիմությունը, ուստի` նրանք այն կփոխարինեն նորով․ գրում է Независимая Газета -ն։ Ամեն դեպքում՝ տեղական ինքնակառավարման մարմինների ընտրությունների արդյունքները արմատապես տարբերվում են խորհրդարանական ընտրությունների արդյունքներից: Կայքը հիշեցրել է, որ հունիսին Քաղաքացիական պայմանագիրը ստացել էր ձայների 49.74%-ը: Ինչպես նկատում է НГ-ն, այս անգամ էլ սկանդալներ եղան: Օրինակ՝ Ստեփանավանի ընտրություններին նախորդել էին ընդդիմադիր Ուժեղ Հայաստան կուսակցության թեկնածուների և կողմնակիցների ձերբակալություններն՝ ընտրակաշառք տալու և ստանալու մեղադրանքով: Քվեարկությունից չորս օր առաջ անվտանգության ուժերը ձերբակալել են կուսակցության համայնքի ղեկավարի թեկնածու Արսեն Գևորգյանին՝ ևս 13 մարդու հետ միասին: Երկու օր անց ևս 10 մարդ բանտարկվել է: Ուժեղ Հայաստանը հայտարարել է, որ այդ ձերբակալությունները քաղաքական են։ Ընտրություններից մեկ օր առաջ Եղեգնաձորում ձերբակալվել են Հանրապետություն կուսակցության անդամներ՝ համայնքի ղեկավար Դավիթ Հարությունյանը և նրա տեղակալ Վարդան Ավագյանը, ինչպես նաև ավագանու երեք այլ թեկնածուներ։ Նրանք նույնպես կասկածվում էին ընտրակաշառք բաժանելու համար։ Նմանատիպ միջադեպեր են տեղի ունեցել նաև Արթիկում և Մարտունիում։