Մյունխենի «Բավարիայի» և Անգլիայի հավաքականի հարձակվող Հարի Քեյնը կարիերայում առաջին անգամ արժանացել է «Ոսկե գնդակ» մրցանակին, որը ֆրանսիական France Football ամսագիրն ամեն տարի հանձնում է աշխարհի լավագույն ֆուտբոլիստին: Այս տարի 33-ամյա ֆուտբոլիստը «Բավարիայի» կազմում նվաճել էր Գերմանիայի չեմպիոնի կոչումը, իսկ Անգլիայի հավաքականի հետ դարձել էր աշխարհի առաջնության բրոնզե մեդալակիր: Նախորդ մրցաշրջանում Հարի Քեյնը բոլոր մրցաշարերում մասնակցել է 65 հանդիպման ու դարձել 73 գոլի հեղինակ։ Նախորդ անգամ անգլիացի ֆուտբոլիստներից «Ոսկե գնդակի» արժանացել էր Մայքլ Օուենը՝ պատվավոր մրցանակը ստանալով 2001 թվականին: «Ոսկե գնդակի» 70-րդ մրցանակաբաշխությունում անգլիացին ստացել է նաև տարվա լավագույն հարձակվողի մրցանակը: «Ոսկե գնդակի» քվեարկության լավագույն տասնյակում էին նաև Լամին Յամալը («Բարսելոնա», Իսպանիա), Կիլիան Մբապեն («Ռեալ», Ֆրանսիա), Լիոնել Մեսին («Ինտեր Մայամի», Արգենտինա), Ուսման Դեմբելեն (ՊՍԺ, Ֆրանսիա), Էրլինգ Հոլանդը («Մանչեսթեր Սիթի», Նորվեգիա), Խվիչա Կվարացխելիան (ՊՍԺ, Վրաստան), Մայքլ Օլիսեն («Բավարիա», Ֆրանսիա), Ռոդրին («Բարսելոնա», Իսպանիա) և Ֆաբիան Ռուիսը (ՊՍԺ, Իսպանիա): Տարվա լավագույն մարզիչի մրցանակին արժանացել է աշխարհի ու Եվրոպայի չեմպիոն Իսպանիայի հավաքականը գլխավորող Լուիս դե լա Ֆուենտեն։ Լավագույն դարպասապահ է ճանաչվել Իսպանիայի հավաքականի ու Բիլբաոյի «Աթլետիկի» ներկայացուցիչ Ունայ Սիմոնը: Իսպանիայի չեմպիոն «Բարսելոնայի» և աշխարհի ու Եվրոպայի չեմպիոն Իսպանիայի հավաքականի եզրային հարձակվող Լամին Յամալը երրորդ անգամ անընդմեջ ստացել է տարվա լավագույն երիտասարդ խաղացողի մրցանակը: Ակումբային ֆուտբոլում տարվա լավագույն թիմ է ճանաչվել Չեմպիոնների լիգայի հաղթող ֆրանսիական ՊՍԺ-ն: Կանանց «Ոսկե գնդակին» արժանաել է «Լոնդոն Սիթի Լայոնեսիսի» իսպանացի կիսապաշտպան Ալեսյա Պուտելյասը։ «Ոսկե գնդակի» 70-րդ մրցանակաբաշխությունը կայացել է Լոնդոնում։ Դավիթ Եղիազարյան