Վարչապետ Նիկոլ Փաշինեան Հոկտեմբեր 9-ին Թուրքմէնիստանի մէջ հանդիպում ունեցած է Իրանի նախագահ Մասուտ Փեզեշքեանի հետ։ Հանդիպումը տեղի ունեցած է ԱՊՀ-ի պետութիւններու ղեկավարներու խորհուրդի նիստին առընթեր եւ երկու ղեկավարներուն երկրորդ տեսակցութիւնն էր շուրջ երկու շաբաթուան ընթացքին. անոնք նախապէս հանդիպած էին Սեպտեմբեր 24-ին Նիւ Եորքի մէջ՝ ՄԱԿ-ի Ընդհանուր ժողովի ծիրին մէջ։ Հայաստանի վարչապետի աշխատակազմին համաձայն՝ Փաշինեան եւ Փեզեշքեան կարեւոր նկատած են բարձր մակարդակի աշխուժ երկկողմ շփումները եւ գոհունակութեամբ արձանագրած, որ անոնք կը նպաստեն Հայաստան-Իրան յարաբերութիւններու հետեւողական զարգացման ու ընդլայնման։ Փաշինեան ընդգծած է, որ երկու երկիրները համագործակցութեան հարուստ օրակարգ ունին եւ իրանական ընկերութիւններ ներգրաւուած են Հայաստան իրականացուող ռազմավարական ծրագրերու մէջ։ Կողմերը համոզում յայտնած են, որ հայ-իրանական յարաբերութիւնները մօտ ապագային նոր մակարդակի պիտի բարձրանան՝ միաժամանակ կարեւոր նկատելով նախատեսուող բարձր մակարդակի փոխադարձ այցելութիւնները։ Հանդիպումը տեղի ունեցած է Երեւանի եւ Թեհրանի միջեւ վերջին օրերու աշխուժ դիւանագիտական շփումներէն ետք։ Հոկտեմբեր 5-ին Արտաքին գործոց նախարար Արարատ Միրզոյեան Թեհրանի մէջ հանդիպած էր Փեզեշքեանի եւ իրանցի իր պաշտօնակից Ապպաս Արաղչիի հետ։ Այդ բանակցութիւններուն ընթացքին քննարկուած էին ուժանիւթի, փոխադրութեան եւ ենթակառոյցներու ծրագրերը, իսկ Միրզոյեան իրանական կողմին ներկայացուցած էր TRIPP ծրագրին իրականացման ընթացքը։ Հոկտեմբեր 8-ին Միրզոյեան եւ Արաղչի հեռաձայնով կրկին անդրադարձած էին Թեհրանի հանդիպումներուն ընթացքին ձեռք բերուած պայմանաւորուածութիւններու գործադրութեան։ TRIPP-ի հարցը վերջին շրջանին յատուկ ուշադրութեան արժանացած է Իրանի մէջ։ Թեհրան մասնաւորաբար մտահոգութիւն յայտնած է Հայաստան-Իրան սահմանին մօտ ամերիկեան ներկայութեան կապակցութեամբ։ Հայաստանի մէջ Իրանի դեսպան Խալիլ Շիրղոլամի Սեպտեմբերին յայտարարած էր, որ Իրանը առարկութիւն չունի ծրագրին դէմ, եթէ պահպանուին Հայաստանի ինքնիշխանութիւնն ու տարածքային ամբողջականութիւնը եւ ամերիկեան զինուորական կամ անվտանգութեան ուժեր չտեղակայուին տարածքին մէջ։ Հայկական կողմը, իր կարգին, կը շեշտէ, որ TRIPP-ը պիտի գործէ Հայաստանի ինքնիշխանութեան եւ իրաւազօրութեան ներքեւ։ Հայաստանի եւ Միացեալ Նահանգներու միջեւ ստորագրուած ծրագրային համաձայնագրին մէջ նոյնպէս ամրագրուած է, որ Հայաստանը ամբողջական իշխանութիւն կը պահպանէ իր ինքնիշխան տարածքին, ներառեալ սահմանային վերահսկողութեան եւ անվտանգութեան հարցերուն մէջ։ Սակայն Փաշինեան–Փեզեշքեան Հոկտեմբեր 9-ի հանդիպման մասին Երեւանի պաշտօնական հաղորդագրութիւնը TRIPP-ը իբրեւ քննարկման առանձին թեմա չի նշեր։ Ըստ հաղորդագրութեան՝ երկու ղեկավարները մտքեր փոխանակած են նաեւ «երկուստեք հետաքրքրութիւն ներկայացնող այլ հարցերու» շուրջ։