Եվրամիությունը մտադիր չէ Ռուսաստանի և ԱՄՆ-ի հետ քննարկել Եվրոպայում անվտանգության ճարտարապետության հարցը։ Այս կարծիքն է հայտնել ԵՄ արտաքին գործերի և անվտանգության քաղաքականության հարցերով բարձր ներկայացուցիչ Կայա Կալլասը Վարշավայում կայացած մամուլի ասուլիսի ժամանակ։ Նա մասնակցել է Ուկրաինայի և Լեհաստանի արտգործնախարարների բանակցություններին։ Կալլասի խոսքով՝ Եվրամիությունը մտադիր չէ քննարկել Եվրոպայի անվտանգության նոր ճարտարապետության ձևավորման հարցը, այլ նպատակ ունի պահպանել գործող համակարգը, որը հիմնված է ԵՄ-ի և ՆԱՏՕ-ի վրա։ Միևնույն ժամանակ, Կալլասը պնդել է, որ Ուկրաինայի հարցով ԱՄՆ-ի և Ռուսաստանի միջև բանակցություններին պետք է մասնակցի նաև Եվրամիությունը։ Սակայն նա չի հստակեցրել, թե ով և ինչ մանդատի հիման վրա կարող է ներկայացնել ԵՄ-ն այդ բանակցություններում։ Ավելի վաղ Բրյուսելի աղբյուրները հաստատել էին, որ Եվրամիությունը Ռուսաստանի և ԱՄՆ-ի հետ բանակցություններ վարելու համար չունի ո՛չ բանակցող, ո՛չ բանակցային դիրքորոշում, ո՛չ էլ համապատասխան մանդատ։ —00—ՍՊ The post Կալլաս․ ԵՄ-ն մտադիր չէ վերանայել Եվրոպայի անվտանգության գործող համակարգը appeared first on 24News .