ԵՐԵՎԱՆ, 5 նոյեմբերի – Sputnik․ Հայաստանում կներդրվի «Ֆիզիկական արհեստական բանականության 7–ամյա ծրագիրը»։ Համապատասխան որոշումն այսօր ընդունվեց ՀՀ կառավարության նիստի ժամանակ։ՀՀ կրթության, գիտության, մշակույթի և սպորտի նախարար Ժաննա Անդրեասյանի խոսքով` այս ծրագիրը գործելու է պետություն–մասնավոր հատված համագործակցությամբ, նպատակն է ԵՊՀ–ում, Հայաստանի ազգային պոլիտեխնիկական համալսարանում, Հայաստանի ամերիկյան համալսարանում ձևավորել ռոբոտաշինության և արհեստական բանականության հատման ոլորտում միջազգայինորեն մրցունական գիտահետազոտական և կրթական կարողություններ։ Անդրեասյանը տեղեկացրեց, որ առաջին տարում պետությունը ծրագրի համար կհատկացնի 168,4 մլն դրամ, որը կուղղվի գիտնականների վարձատրությանը։ Նախարարը հույս ունի, որ 7 տարվա ընթացքում կունենանք 330 շրջանավարտ, միջազգային պարբերականներում` 20–ից ավելի գիտական հոդվածներ, 2 գյուտի արտոնագիր, 14 միջազգային գիտաժողով/աշխատաժողովի կազմակերպում։Ըստ նրա` կստեղծվի երկու ժամանակակից ռոբոտաշինական լաբորատորիա՝ Հայաստանի ազգային պոլիտեխնիկական համալսարանում և գործընկեր համալսարաններից մեկում, ինչպես նաև Firebird նախաձեռնության GPU ենթակառուցվածքից օգտվելու հնարավորություն։