Ուկրաինայի նախագահ Վլադիմիր Զելենսկին հրամանագիր է ստորագրել Ամերիկայի Միացյալ Նահանգների առաջին տիկին Մելանյա Թրամփին Օլգա իշխանուհու 1-ին աստիճանի շքանշանով պարգևատրելու մասին։ Ինչպես նշվում է պաշտոնական հայտարարության մեջ, բարձրագույն պարգևը շնորհվել է Ուկրաինային ցուցաբերած զգալի անձնական ներդրման, մարդասիրական օգնության, ինչպես նաև ռուս-ուկրաինական պատերազմի հետևանքով տուժած, ապօրինի տեղահանված և բռնի տեղափոխված ուկրաինացի երեխաների ու քաղաքացիների փրկությանն ուղղված ակտիվ բարեգործական և իրավապաշտպան գործունեության համար։ Հատուկ ընդգծվում է Մելանյա Թրամփի նախաձեռնությամբ և աջակցությամբ իրականացված մարդասիրական առաքելությունը, որի շնորհիվ կազմակերպվել է Խերսոնի մարզի Ալեշկի քաղաքի բնակիչների տարհանումը։ Իշխանուհի Օլգայի շքանշանը Ուկրաինայի պետական մրցանակ է, որով պարգևատրվում են կանայք՝ պետական, արտադրական, գիտական, մշակութային, բարեգործական և հասարակական գործունեության մեջ ակնառու հաջողությունների համար։