Բնակչության պետական ռեգիստրի նոր հարթակում նախատեսվում է քաղաքացիներին հնարավորություն տալ տեսնելու, թե իրենց վերաբերյալ տվյալները երբ և ում կողմից են որոնվել։ Այս մասին նոյեմբերի 4-ին լրագրողների հետ ճեպազրույցում ասել է ՀՀ ներքին գործերի նախարար Արփինե Սարգսյանը։ Հարթակի գործարկումը նախատեսվում է 2027 թվականի հունվարի 1-ից։ «Ներքին գործերի նախարարությունը հստակ գիտի՝ օրինակ՝ Արփինե Սարգսյան անուն-ազգանունով անձի հետ կապված տվյալ փնտրվե՞լ է համակարգում, թե՞ չի փնտրվել, օգտագործվե՞լ է, թե՞ չի օգտագործվել, ե՞րբ է օգտագործվել, ո՞ր ժամին է օգտագործվել»,-նշել է Սարգսյանը։ Նա հավելել է, որ նախատեսվող հարթակում քաղաքացին ևս կկարողանա ստանալ իր տվյալների օգտագործման վերաբերյալ տեղեկություն և անհրաժեշտության դեպքում դիմել իրավունքների պաշտպանության համար։ «Եթե դուք տեսնեք, օրինակ, որ ձեր ազգանվամբ որևէ փնտրման գործընթաց կա, կհասկանաք՝ ով է փնտրել։ Եթե կունենաք որևէ առարկություն կամ չեք հասկանա՝ ինչու է փնտրվել տվյալը, կարող եք դիմել և իրավունքների պաշտպանությունն ապահովել»,-ասել է նախարարը։