Բժշկական ապահովագրական համակարգի ներդրմամբ որոշակի բժշկական ծառայություններ, որոնք մինչ այդ անվճար էին, հանկարծ դարձան վճարովի։ Այս մասին ԱԺ-ում ասել է «Հայաստան» խմբակցության պատգամավոր Արթուր Խաչատրյանը՝ դիմելով ֆինանսների նախարար Վահե Հովհաննիսյանին։ «Օրինակ՝ աչքեր ստուգելը մինչև որոշակի տարիքային շեմ անվճար էր, իսկ հիմա պետք է վճարել։ Հաշվարկե՞լ եք, թե լրացուցիչ ինչքան բեռ է դրվել քաղաքացիների վրա, ովքեր մինչև 2026 թվականի նոյեմբերի 2-ը չէին վճարում այդ ծառայության համար»,-ասել է պատգամավորը։ Նա բարձրացրել է նաև սոցփաթեթների և առողջապահական ապահովագրության փոփոխությունների հարցը։ «Սոցփաթեթ ունեցողներից փաստացի վերցնում եք այդ փաթեթը։ Ստացվում է՝ եթե մարդը առողջ է եղել և բժշկի չի դիմել, դուրս է մնում համակարգից։ Ապահովագրությունն այդպես չի գործում, որ մարդը մի բան էլ վնասով դուրս գա»,- ընդգծել է Խաչատրյանը։ Ի պատասխան՝ Վահե Հովհաննիսյանը նշել է, որ սակագներին ծանոթ չէ և նման վերլուծություն չունեն, սակայն հավելել է, որ ըստ իր անձնական կարծիքի՝ բոլոր ծառայությունների համար պետք է գործի համավճար, որպեսզի քաղաքացիներն ավելի պատասխանատու լինեն, և վերահսկվի որակը։ Անդրադառնալով նախարարի դիտարկմանը, Արթուր Խաչատրյանը հակադարձել է․ «Անվճար պանիրը թակարդում է լինում։ Ես 10 000 դրամ վճարում եմ, այստեղ անվճար ոչ մի բան չկա»։ The post Անվճար պանիրը թակարդում է լինում, ես 10 000 դրամ վճարում եմ». Արթուր Խաչատրյանը՝ Վահե Հովհաննիսյանին appeared first on Alphanews .