Կապան համայնքում նոյեմբերի 29-ին կայանալիք տեղական ինքնակառավարման մարմինների (ՏԻՄ) ընտրություններին կմասնակցի երեք քաղաքական ուժ՝ «Շանթ դաշինք» ազգայնական կուսակցությունը, «Ապրելու երկիր» կուսակցությունը և «Քաղաքացիական պայմանագիր» կուսակցությունը։ Հոկտեմբերի 31-ին Կենտրոնական ընտրական հանձնաժողովում (ԿԸՀ) կայացած վիճակահանության արդյունքում որոշվել են ընտրություններին մասնակցող քաղաքական ուժերի քվեաթերթիկների հերթական համարները։ Վիճակահանությամբ՝ Կապանի ավագանու ընտրություններում «Շանթ դաշինք» ազգայնական կուսակցությունը հանդես կգա 2-րդ համարի ներքո։ Կուսակցության ընտրական ցուցակը գլխավորում է Կապանի գործող համայնքապետ Գևորգ Փարսյանը։ Ցուցակի երկրորդ տեղում համայնքի ղեկավարի առաջին տեղակալ Գոռ Թադևոսյանն է, իսկ երրորդ տեղում՝ Կապանի «Թումո» կենտրոնի համակարգող Անուշ Մեժլումյանը։ Դաշինքի ընտրական ցուցակում ընդգրկված է 70 թեկնածու։ «Ապրելու երկիր» կուսակցությունը քվեաթերթիկում կլինի 3-րդ համարի ներքո։ Կուսակցության ընտրական ցուցակը գլխավորում է Տիգրան Աղասյանը։ Ցուցակի երկրորդ հորիզոնականում Կապանի ավագ դպրոցի ուսուցչուհի Սոֆյա Հարությունյանն է, իսկ երրորդում՝ Արկադիա Լալազարյանը։ Կուսակցությունն ընտրություններին ներկայանում է 23 հոգանոց ցուցակով։ Իսկ իշխող «Քաղաքացիական պայմանագիր» կուսակցությունը հանդես կգա 10-րդ համարի ներքո։ ՔՊ-ի ընտրական ցուցակը գլխավորում է Նարեկ Բաբայանը, որը Զանգեզուրի պղնձամոլիբդենային կոմբինատում կառավարության ներկայացուցիչն է և ՔՊ Կապանի տարածքային խորհրդի ղեկավարը։ Ցուցակի երկրորդ տեղում Սյունիքի մարզպետի տեղակալ Հայկ Հարությունյանն է, իսկ երրորդում՝ Ազգային ժողովի նախկին պատգամավոր Մարինա Ղազարյանը։ Կուսակցության ցուցակում ընդգրկված է 71 թեկնածու։ Հատկանշական է, որ ընտրություններին մասնակցող երեք քաղաքական ուժերն էլ տարբեր թվով թեկնածուներով են ներկայանում։ «Շանթ դաշինքի» ցուցակում 70, «Ապրելու երկրի» ցուցակում՝ 23, իսկ ՔՊ-ի ցուցակում՝ 71 թեկնածու է ընդգրկված։ Նշենք, որ Կապանի ավագանին բաղկացած է լինելու 27 անդամից, իսկ համայնքում ընտրողների թիվը կազմում է 33 հազար 340։ Ընտրություններն անցկացվելու են համամասնական ընտրակարգով, այսինքն՝ ընտրողները քվեարկելու են քաղաքական ուժերի ընտրական ցուցակների օգտին։ Հիշեցնենք, որ Կապան համայնքի ավագանու ընտրությունները տեղի կունենան 2026 թվականի նոյեմբերի 29-ին։ Քվեարկությունը կանցկացվի ժամը 08։00-ից մինչև 20։00-ն։ Նանիկ Աղասյան