Ռուսական զորքերը լույս նոյեմբերի 3-ի գիշերը բալիստիկ հրթիռներով և կառավարվող ավիառումբերով հարված են հասցրել Խարկովին։ Այս մասին հայտնել է քաղաքի քաղաքապետ Իգոր Տերեխովը։ Նրա խոսքով՝ հարվածի տակ է հայտնվել բժշկական հաստատություն, գրում է Meduza-ն։ Խարկովի մարզային վարչակազմի ղեկավար Օլեգ Սինեգուբովը հստակեցրել է, որ հարվածը հասցվել է Նեմիշլյանսկի շրջանում գտնվող բժշկական հաստատության մասնաշենքերը միացնող անցուղուն։ Խարկովի մարզային դատախազությունը հայտնում է, որ քննության տվյալներով՝ նոյեմբերի 3-ին՝ մոտավորապես ժամը 03:20-ին, Ռուսաստանի զինված ուժերը ավիահարված են հասցրել Խարկովի Նեմիշլյանսկի շրջանին։ Վնասվել են բուժհաստատության ճակատային հատվածն ու բաժանմունքներից մեկը, կոտրվել են պատուհանները։ Տուժել են նաև մեկ այլ բուժանմունք, լաբորատորիան և մոտակա 10 բազմաբնակարան շենքերի պատուհանները։ Տուժել է 73 մարդ, այդ թվում՝ հիվանդանոցի պացիենտներ, բուժաշխատողներ և հարակից շենքերի բնակիչներ։ 226 պացիենտի տարհանել են այլ բժշկական հաստատություններ։ Իրավապահները հայտնաբերել և առգրավել են զինամթերքի բեկորներ։ Նախնական տվյալներով՝ դրանք կարող են պատկանել ՖԱԲ-250 ավիառումբին։ Դնեպրին հարվածի հետևանքով 15 մարդ է տուժել, նրանցից երեքը ծանր վիճակում է։ Այս մասին հայտնել է Դնեպրոպետրովսկի մարզային ռազմական վարչակազմի ղեկավար Ալեքսանդր Գանժան։ Վնասվել են ենթակառուցվածքներ, բնակելի տներ և վարչական շենքեր։ Բացի այդ, ռուսական զինուժը հարվածել է նաև Կրիվոյ Ռոգի շրջանի ենթակառուցվածքներին։ Վիննիցայի մարզում էներգետիկ օբյեկտների և էլեկտրահաղորդման գծերի վնասման հետևանքով բնակավայրերի մեծ մասը մնացել է առանց էլեկտրամատակարարման։ Ժիտոմիրի մարզում էլ ռուսական հարվածից հետո էներգետիկ ենթակառուցվածքներին՝ գրեթե 130 բնակավայր (ավելի քան 180 հազար բաժանորդ) զրկվել է էլեկտրականությունից։ Ռուսաստանի պաշտպանության նախարարությունը հայտարարել է, որ Վիննիցայի մարզում հարված է հասցվել Լադիժինի ջերմաէլեկտրակայանին, Դնեպրոպետրովսկի մարզում՝ Կրիվոյ Ռոգի և Պրիդնեպրովսկի ջերմաէլեկտրակայաններին, Խարկովի մարզում՝ Խարկովի ջերմաէլեկտրակայանին, Զմիևսկայա և Լոսևո էլեկտրաենթակայաններին։ Օդեսայի մարզում, ըստ գերատեսչության, թիրախավորվել են Կիլիա նավահանգստի ենթակառուցվածքները և երկու բեռնատար նավ։ Թարգմանությունը՝ Էմմա Չոբանյանի