Ազգային ժողովում ուժային կառույցների ղեկավարների մասնակցությամբ քննարկվելու է Սյունիքի մարզի Շաքի բնակավայրում ադրբեջանցի զինծառայողի մասնակցությամբ տեղի ունեցած միջադեպը։ ԱԺ-ում կայանալիք փակ հանդիպմանը մասնակցելու են պաշտպանության նախարար Սուրեն Պապիկյանը, ԱԱԾ տնօրեն Անդրանիկ Սիմոնյանը, ներքին գործերի նախարար Արփինե Սարգսյանը և Քննչական կոմիտեի նախագահ Արթուր Պողոսյանը։ Այս մասին Factor.am -ին հայտնել է ԱԺ պաշտպանության և անվտանգության հարցերի հանձնաժողովի անդամ, «Հայաստան» խմբակցության պատգամավոր Գեղամ Մանուկյանը։ Ուժային կառույցների ղեկավարների հետ հանդիպումը նախաձեռնել են ընդդիմադիր խմբակցությունները։ Հիշեցնենք՝ հոկտեմբերի 1-ին հայտնի դարձավ, որ ադրբեջանցի զինծառայողը հատել է Հայաստանի պետական սահմանը, ներխուժել Շաքիի բնակիչներից մեկի տուն և կրակոցներ արձակել։ 39-ամյա կինը վիրավորվել էր, վնասվածք էր ստացել նաև նրա երեխաներից մեկը։ Զինծառայողը հայտնաբերվել և ձերբակալվել էր իրավապահների կողմից։ Դեպքից հետո հարցեր էին առաջացել սահմանային անվտանգության, ադրբեջանցի զինծառայողի՝ Հայաստան ներթափանցելու և բնակիչներին հնարավոր վտանգի մասին նախապես չզգուշացնելու վերաբերյալ։ Նարեկ Կիրակոսյան