Խերսոնի մարզի Ալյոշկի քաղաքում մարդասիրական առաքելության շուրջ ստեղծված իրավիճակն ապացուցել է, որ կայուն խաղաղությունը հնարավոր է։ Այս մասին հայտարարել է ԱՄՆ առաջին տիկին Մելանյա Թրամփը։ «Կայուն խաղաղության հույս։ Ալյոշկին ապացուցում է, որ մենք ի վիճակի ենք մարդկայնությունը վեր դասել պատերազմից։ Միասին կարող ենք կառուցել խաղաղ մոլորակ՝ մեր երեխաների համար հույսերով լի աշխարհ»,- X-ի իր էջում գրել է ԱՄՆ նախագահ Դոնալդ Թրամփի կինը։ Ավելի վաղ Ռուսաստանն ու Ուկրաինան՝ ԱՄՆ առաջին տիկնոջ աջակցությամբ, համաձայնել էին հրադադար հաստատել Խերսոնի մարզի Ալյոշկի քաղաքում՝ մարդասիրական գործողություն իրականացնելու համար։ Հոկտեմբերի 27-ին՝ Մոսկվայի ժամանակով ժամը 04:00-ից, ռուսական զինված ուժերը Խերսոնի ուղղությամբ հրադադարի ռեժիմ էին սահմանել՝ քաղաքում մարդասիրական առաքելության նախապատրաստման կապակցությամբ։ Հոկտեմբերի 30-ին իրականացվել է մարդասիրական առաքելություն։ Ռուսաստանի մարդու իրավունքների պաշտպան Յանա Լանտատովայի փոխանցմամբ՝ բնակիչներին բաժանվել է մի քանի տասնյակ տոննա մարդասիրական օգնություն՝ սննդամթերք, հիգիենայի պարագաներ, գեներատորների համար վառելիք և այլ անհրաժեշտ իրեր։ Ցանկություն հայտնած բոլոր բնակիչները հնարավորություն են ունեցել անարգել մեկնելու ինչպես Ռուսաստանի այլ շրջաններ, այնպես էլ Ուկրաինա։