Հայաստանի 12 համայնքներում նոյեմբերի 29-ին կայանալու են տեղական ինքնակառավարման մարմինների ընտրություններ։ Նոյեմբերին Հայաստանի 12 համայնքներում ընտրություններ են․ ովքեր են առաջադրվել Հայաստանի 12 համայնքներում նոյեմբերի 29-ին կայանալու են տեղական ինքնակառավարման մարմինների ընտրություններ։ Համամասնական ընտրակարգով ընտրություններ են լինելու 10 համայնքներում՝ – Լոռու մարզի Սպիտակ, – Գեղարքունիքի մարզի Սեւան, – Շիրակի մարզի Ամասիա եւ Աշոցք, – Սյունիքի մարզի Կապան, – Արմավիրի մարզի Բաղրամյան եւ Մեծամոր, – Արագածոտնի մարզի Ապարան եւ Աշտարակ, – Տավուշի մարզի Նոյեմբերյան։ Մեծամասնական ընտրակարգով ընտրություններ են լինելու Արագածոտնի մարզի Արեւուտ եւ Մեծաձոր համայնքներում։ Որոշ համայնքներում բավականին մրցակցային ընտրություններ են սպասվում, առաջադրվել են 3 ուժեր, որոշներում՝ միայն մեկը։ Օրինակ, Լոռու մարզի Սպիտակ համայնքում առաջադրվել է 3 քաղաքական ուժ՝ «Քաղաքացիական պայմանագիր», որի ցուցակը գլխավորում է գործող համայնքապետ Քաջայր Նիկողոսյանը, «Բարոյական արժեքներ» կուսակցություն, որի ցուցակը գլխավորում է Համլետ Մազմանյանը, եւ «Ուժեղ Հայաստան» կուսակցություն, որի ցուցակը գլխավորում է Արման Ավետիսյանը։ 3 քաղաքական ուժ է մասնակցելու նաեւ Գեղարքունիքի մարզի Սեւան համայնքի ՏԻՄ ընտրություններին։ «Վստահություն» կուսակցությունների դաշինքի ցուցակը գլխավորում է գործող համայնքապետ Սարգիս Մուրադյանը։ Այս դաշինքի կազմում են Հայաստանի աշխատավորական սոցիալիստական եւ Ռամկավար ազատական կուսակցությունները։ Մասնակից մյուս ուժը ՔՊ-ն է, որի ցուցակը գլխավորում է փոխմարզպետ Սուրեն Գրիգորյանը, եւ երրորդ ուժը «Միասնական համայնք» կուսակցությունն է, որի ցուցակի առաջին համարը Վահրամ Գեւորգյանն է։ Սյունիքի մարզի Կապան համայնքի ՏԻՄ ընտրություններին դարձյալ 3 ուժ է մասնակցելու․ գործող համայնքապետ Գեւորգ Փարսյանը գլխավորում է «Շանթ դաշինք» ազգայնական կուսակցության ցուցակը, նախկին փոխմարզպետ Նարեկ Բաբայանը, որը 2018-ին «Իմ քայլը» դաշինքով առաջադրվել էր Կապանում, բայց չէր հաղթել Փարսյանին, գլխավորում է ՔՊ-ի ցուցակը, իսկ «Ապրելու երկիր» կուսակցության ցուցակի առաջին համարը Տիգրան Աղասյանն է։ Տավուշի մարզի Նոյեմբերյան համայնքում առաջադրված երեք ուժերի շարքում է «Ապրելու երկիր» կուսակցությունը, որի առաջին համարը գործող համայնքապետ Արսեն Աղաբաբյանն է։ ՔՊ-ի ցուցակն այստեղ գլխավորելու է Մխիթար Խաչիկյանը, իսկ երրորդ ուժը «Լուսավոր Հայաստան» կուսակցությունն է՝ Նարեկ Սիրադեղյանի գլխավորությամբ։ Շիրակի մարզի Ամասիա համայնքում 2 ուժ է առաջադրվել՝ ՔՊ եւ «Բարոյական արժեքներ» կուսակցությունները, որոնց ցուցակները համապատասխանաբար գլխավորում են գործող ղեկավար Ջեմմա Հարությունյանը եւ Սամվել Ղարիբյանը։ Շիրակի մարզի Աշոցք համայնքում մեկ ուժ է առաջադրվել, եւ դա ՔՊ-ն է․ ցուցակը գլխավորում է գործող համայնքապետ Կարեն Մանուկյանը։ Արմավիրի մարզի Բաղրամյան համայնքում առաջադրվել են ՔՊ եւ Գործարար կուսակցությունները, որոնք հոկտեմբերի ՏԻՄ ընտրություններին մի քանի համայնքներում հանդես էին գալիս «Համերաշխություն» դաշինքով։ ՔՊ-ի թեկնածուն այստեղ գործող համայնքապետ Շանթ Առաքելյանն է, «Գործարարինը»՝ Մհեր Հարթենյանը։ Արմավիրի Մեծամոր համայնքում առաջադրվել են ՔՊ-ն, որի ցուցակը գլխավորում է Սարգիս Արշակյանը, եւ ՀՅԴ-ն, որի ցուցակը գլխավորում է Արամայիս Մխիթարյանը։ Արագածոտնի Ապարան համայնքում առաջադրվել է մեկ ուժ․ դա ՔՊ-ի եւ «Գործարարի» «Համերաշխություն» դաշինքն է․ ցուցակը գլխավորում է գործող համայնքապետ Կարեն Եղիազարյանը։ Արագածոտնի Աշտարակ համայնքում դարձյալ մեկ ուժ է առաջադրվել՝ ՔՊ-ն։ Ցուցակը գլխավորում է գործող համայնքապետ Թովմաս Շահվերդյանը։ Արագածոտնի Արևուտ եւ Մեծաձոր համայնքներում ովքեր են առաջադրվել, դեռեւս ԿԸՀ-ն չի ներկայացրել։ The post Նոյեմբերի 29-ին կանցկացվեն ՏԻՄ ընտրություններ ՀՀ 12 համայնքներում․ որոնք են ներկայացված ուժերը appeared first on Infocom .