«Ժողովուրդ» օրաթերթը շարունակում է ուսումնասիրել Ազգային ժողովի պատգամավորների անցած ուղին, աշխատանքային գործունեությունն ու հայտարարագրած ունեցվածքը։ Այս անգամ մեր ուշադրության կենտրոնում է «Քաղաքացիական պայմանագիր» խմբակցության պատգամավոր Նարեկ Բաբայանը, որի անունը վերջին շրջանում հաճախ է հայտնվում խորհրդարանում տեղի ունեցող վեճերի և բախումների համատեքստում։ Ինչպես արդեն գրել էինք, պատմաբան Նարեկ Բաբայանը խորհրդարան է եկել համայնքային քաղաքական գործունեությունից և անհատ ձեռնարկատիրությունից։ Նա ծնվել է 1991 թվականի սեպտեմբերի 11-ին՝ Կոտայքի մարզի Ալափարս գյուղում։ 2013 թվականին ավարտել է Երևանի պետական համալսարանի պատմության ֆակուլտետը։ 2012-2017 թվականներին եղել է Ալափարսի համայնքի ավագանու անդամ, 2017-2022 թվականներին՝ Չարենցավանի համայնքի ավագանու անդամ։ 2015-2026 թվականներին ղեկավարել է «Նարեկ Բաբայան» անհատ ձեռնարկատիրությունը, իսկ 2022-2026 թվականներին եղել է Չարենցավանի ավագանու ՔՊ խմբակցության անդամ։ 2026 թվականի օգոստոսի 2-ից նա Ազգային ժողովի պատգամավոր է։ Հիշեցնենք, որ խորհրդարանում տեղի ունեցած բախումների ժամանակ Նարեկ Բաբայանը հայտնվել էր միջադեպերի կիզակետում։ Մինչդեռ օրենսդիր մարմնում պատգամավորներից հանրությունը ակնկալում է քաղաքական բանավեճ, փաստարկված ելույթներ և օրենսդրական աշխատանք։ Սակայն այս անգամ «Ժողովուրդ» օրաթերթը ուսումնասիրել է, թե ինչ ունեցվածք է հայտարարագրել Նարեկ Բաբայանը պաշտոնեական պարտականությունները դադարեցնելու օրվա դրությամբ։ Անշարժ գույք Ըստ ներկայացված հայտարարագրի՝ Նարեկ Բաբայանն ունի հինգ հողամաս։ Դրանցից մեկը գտնվում է Կոտայքի մարզի Աբովյան քաղաքում։ Այն ձեռք է բերել 2023 թվականի մայիսի 31-ին՝ գնման եղանակով։ Մյուս չորս հողամասերը գտնվում են Կոտայքի մարզի Չարենցավան համայնքում։ Դրանք ձեռք են բերվել 1991 և 1992 թվականներին՝ այլ եղանակով։ Հայտարարագրում նշված է, որ հողամասերը համատեղ սեփականության իրավունքով են պատկանում նրան։ Հայտարարագրում բնակարան կամ առանձնատուն նշված չէ։ Տրանսպորտային միջոցներ Բաբայանը տրանսպորտային միջոց չի հայտարարագրել։ Հայտարարագրում բացակայում են նաև նրա կողմից փաստացի տիրապետվող՝ այլ անձանց պատկանող մեքենաների վերաբերյալ տվյալները։ Դրամական միջոցներ Նարեկ Բաբայանը կանխիկ դրամի տեսքով հայտարարագրել է 3 միլիոն 500 հազար դրամ։ Միաժամանակ բանկային հաշիվների մնացորդների, բանկային ավանդների, էլեկտրոնային հաշիվների կամ կրիպտոարժույթի վերաբերյալ տվյալներ ներկայացված չեն։ Եկամուտ և պարտավորություններ ArmLur.am –ը պարզեց, որ հայտարարագրի համաձայն՝ հաշվետու ժամանակաշրջանում Բաբայանը ձեռնարկատիրական գործունեությունից ստացել է 500 հազար դրամ եկամուտ։ Եկամուտը գոյացել է իր՝ «Նարեկ Բաբայան» անհատ ձեռնարկատիրությունից։ Պաշտոնեական պարտականությունները դադարեցնելու օրվա դրությամբ նրա վարկի մայր գումարի մնացորդը կազմել է 2 միլիոն 43 հազար 3 դրամ։ Հատկանշական է, որ հայտարարագրում նշված է նաև նրա՝ 100 տոկոս մասնակցությունը «Նարեկ Բաբայան» ԱՁ-ում։ Անհատ ձեռնարկատիրոջ գործունեությունը որպես շահերի հայտարարագրի տվյալ գրանցվել է 2025 թվականի նոյեմբերի 1-ին։ Նշենք, որ Նարեկ Բաբայանը Չարենցավանի համայնքի ավագանու անդամի պաշտոնը դադարեցրել է 2026 թվականի ապրիլի 17-ին, իսկ հայտարարագիրը ներկայացրել է նույն թվականի մայիսի 19-ին։ Այսպիսով, ըստ «Ժողովուրդ» օրաթերթի ուսումնասիրության նրա հայտարարագրած ունեցվածքի հիմնական մասը հինգ հողամասերն ու 3 միլիոն 500 հազար դրամ կանխիկ գումարն են։ Միաժամանակ նա ունի 2 միլիոն 43 հազար 3 դրամ վարկային պարտավորություն։ Սոնա Գրիգորյան