Ճեպազրույցի ընթացքում ՀՀ վարչապետ Նիկոլ Փաշինյանը մեկնաբանել է Ազգային ժողովի նիստերի դահլիճում տեղի ունեցած բախումը: Դիրքորոշումը. Վարչապետը նշել է, որ դատապարտում է բռնությունը, սակայն աջակցում է «Քաղաքացիական պայմանագիր» խմբակցության պատգամավորների ձեռնարկած միջոցառումներին: Պատասխանատվությունը. Փաշինյանը տեղի ունեցած միջադեպի ամբողջ պատասխանատվությունը դրել է ընդդիմադիր պատգամավորների վրա: Վարչապետն անդրադարձել է նաև Սահմանադրության փոփոխության շուրջ ծավալվող քննարկումներին: Առաջարկ ընդդիմությանը. Փաշինյանի խոսքով՝ մեծ է հավանականությունը, որ գործը չի հասնի արտահերթ ընտրությունների, և կձևակերպվի մի առաջարկ, որից ընդդիմությունը չի կարողանա հրաժարվել: Նշանակությունը. Նա ընդգծել է, որ Սահմանադրության փոփոխությունը ներքին օրակարգային հարց է, որն ունի նաև տարածաշրջանային ու միջազգային նշանակություն: (Ավելի վաղ ԱԳՆ ղեկավար Արարատ Միրզոյանն առաջարկել էր ընդդիմությանը կողմ քվեարկել, եթե հաստատվի, որ դա Բաքվի վերջին նախապայմանն է խաղաղության համար): Կառավարությունը հավանություն է տվել օրենսդրական փոփոխությունների նախագծին, որով սահմանվում են արտոնություններ ՆԳՆ ուսումնական հաստատության սովորողների համար: Կարգավորումը. Ուսանողները կստանան տարկետում ուսման ամբողջ ընթացքում, իսկ բուհն ավարտելուց հետո ՆԳՆ համակարգում ծառայության անցնելու դեպքում ամբողջությամբ կազատվեն պարտադիր զինվորական ծառայությունից: Փորձագիտական կարծիք. Մինչ Կառավարությունը նպատակ է դնում ընդլայնել մասնագիտական կրթությունը, փորձագետները նշում են, որ սա կարող է դառնալ բանակից խուսափելու այլընտրանքային ճանապարհ: Կառավարության նիստում Նիկոլ Փաշինյանը բարձրացրել է տեղական շուկայում ներկրված մրգերի գերիշխման հարցը: Պատճառը. Վարչապետի պարզաբանմամբ՝ սուպերմարկետներին և ներկրողներին ավելի հեշտ է աշխատել դրսի արտադրողների հետ, քանի որ մատակարարման ամբողջ շղթան փաստաթղթավորված է: Լուծումը. Փաշինյանը հայտարարել է, որ գործող հարկային համակարգը խթանել է ներմուծումը և խոչընդոտել հայկական տնտեսությունների ապրանքի վաճառքը, ինչի պատճառով Կառավարությունը որոշել է հարկային դաշտ բերել գյուղոլորտը: ՀՀ Կենտրոնական բանկը հանդես է եկել հայտարարությամբ՝ քաղաքացիներին զգուշացնելով ԿԲ անունից տարածվող կեղծ լիազորագրերի և փաստաթղթերի մասին: Զեղծարարների սխեման. Խարդախները կեղծ փաստաթղթերի միջոցով փորձում են քաղաքացիների անունից վարկեր ձևակերպել և այլ ապօրինի գործարքներ իրականացնել: ԿԲ հորդորը. Ֆինանսական կազմակերպությունները սպասարկման ընթացքում նման փաստաթղթեր չեն պահանջում: Կասկածելի դեպքերում քաղաքացիներին կոչ է արվում անմիջապես կապ հաստատել իրենց սպասարկող բանկի հետ: