Մարդու իրավունքների պաշտպան Անահիտ Մանասյանը խստորեն դատապարտել է Ազգային ժողովում պատգամավորների մասնակցությամբ տեղի ունեցած միջադեպը՝ ընդգծելով, որ խորհրդարանը պետք է լինի ժողովրդավարական քննարկումների հարթակ, այլ ոչ թե «մարտադաշտ»։ Մանասյանի խոսքով՝ բարձրաստիճան պաշտոնյաների կողմից բռնության ցանկացած դրսևորում նպաստում է հասարակությունում բռնությունն արդարացնող մոտեցումների տարածմանը։ Նա պահանջել է բացառել ինչպես բռնի վարքագիծը, այնպես էլ բռնությունն արդարացնող խոսքը՝ շեշտելով, որ միջադեպը պետք է պատշաճ քննության առարկա դառնա։ ՄԻՊ-ի հայտարարությունը՝ ստորև․ «Մարդու իրավունքների պաշտպան Անահիտ Մանասյանը խստորեն դատապարտում է Ազգային ժողովում պատգամավորների մասնակցությամբ տեղի ունեցած միջադեպը։ Պաշտպանը վերահաստատում է՝ խորհրդարանը պետք է ժողովրդավարական քննարկումների հարթակ լինի, այլ ոչ «մարտադաշտ»։ Բարձաստիճան պաշտոնատար անձանց, այդ թվում` պատգամավորների կողմից բռնության ցանկացած դրսևորում նպաստում է հասարակությունում բռնությունը որպես տարաձայնությունների լուծման միջոց ընկալելու և այն արդարացնելու մոտեցումների տարածմանը։ Հանրային խոսքում և վարքագծում բռնության բացառումը պետական իշխանության ներկայացուցիչների պատասխանատվությունն է։ Մարդու իրավունքների պաշտպանը պահանջում է բացառել ոչ միայն բռնություն ենթադրող վարքագիծն, այլ նաև բռնությունն արդարացնող ցանկացած խոսք: Միջադեպը պետք է օրենքով սահմանված կարգով դառնա պատշաճ քննության առարկա: Նման միջադեպերն էլ ավելի են խորացնում բռնությունն արդարացնող այն մոտեցումները, որոնց անընդունելիությանն այսօր Մարդու իրավունքների պաշտպանն անդրադարձել էր ընտանեկան բռնության կանխարգելման թեմայով հրապարակային քննարկումների առնչությամբ տարածած հայտարարությունում»։ Հիշեցնենք՝ այսօր՝ հոկտեմբերի 29-ին, Ազգային ժողովում «Քաղաքացիական պայմանագիր» և «Ուժեղ Հայաստան» խմբակցությունների պատգամավորների միջև ծեծկռտուք է տեղի ունեցել։ Միջադեպին միջամտել են ԱԺ անվտանգության աշխատակիցները, իսկ նիստը նախագահող Ռուբեն Ռուբինյանը ստիպված է եղել ընդմիջում հայտարարել։